Liqanjwe ngobedlalela iSundowns elilodwa lamawele amane
Njabulo Shezi
Unina wezingane ezine azibelethe ngesikhathi esisodwa KwaZulu-Natal useqambe le engumfana kuzo ngomdlali obegijima kwiMamelodi Sundowns ngesizini edlule.
Le ntokazi ebusiswe ngezingane ezine ngesikhathi esisodwa ithe beyilindele ezintathu kodwa yethuka seyibeletha ezine.
“Ngijabule kakhulu. Ekhaya, nabo bajabule. Abakukholwa lokhu okwenzekile,” kusho uNonhlanhla Khumalo esitatimendeni somnyango wezempilo eKZN..
“UNkulunkulu ungiphe isipho ebengingasilindele. Bengilindele izingane ezintathu, kodwa unginikeze ezine…”
La mawele aqanjwe ukuthi ngoLulonke, uLunathi, uLukhona noMailula… UMailula uyena yedwa umfana.
Uqanjwe ngoCassius Mailula obedlala kwiSundowns ngesizini edlule nosedlala e-USA manje.
UMailula, oneminyaka engu-22 uthengwe yiToronto FC edlala kwi-US Major League Soccer.
Lokhu kulandela ukuthi ebe nesizini enhle kwiPSL la abeyiqhawe leSundowns inqoba isicoco seDStv Premiership ihlandla lesithupha kulandelana.
FUNDA NALA: Akudikizi nqulu kuNtseki ngabamngabazayo ekutakuleni iChiefs
Ngokwesitaimende somnyango wezempilo, akucaciswanga ukuthi ngabe uNonhlanhla lona ungumlandeli weSundowns noma ubethandiswa uMailula nje ngesikhathi ekhulelwe.
