Useyogijima kwelaseTurkey umgadli obekwiTS Galaxy

Njabulo Shezi

Umgadli obedlala kwiTS Galaxy, uDjakaridja Junior Traorè, usethulwe yiqembu laseTurkey njengomdlali walo kulandela ukushiya kwakhe kuleli.

UTraore usayine eqenjini elidlala kwiSuperliga, i-Istanbulspor. Akukaveli ke ukuthi lokhokhiswe malini ngesikhathi limthenga kwiGalaxy.

Lo mdlali oneminyaka engu-25 uhlale isizini eyodwa kwiDStv Premiership. Ufike kwiGalaxy esuka kwiSK Rakovnik yaseCzech Republic.

UTraore, odabuka e-Ivory Coast, ushaye amagoli ayisikhombisa emidlalweni engu-18 ngesizini ka-2022/23.

Lokhu kuhehe aamaqembu amaningi okuyikho okwenze iGalaxy isheshe isayine uThamsanqa Gabuza no-Abdel Latif Bamba ukuvala isikhala sakhe.

Ngaphezu kukaTraore, leli qembu lidayise nabanye abadlali abaningana kuleli windi.

Kulabo badlali kukhona oBathusi Aubaas, Given Msimango, Melusi Buthelezi, Tshegofatso Nyama no-Aphelelo Teto.

U-Aubass uye kwiMamelodi Sundowns, uMsimangi waya kwiKaizer Chiefs, uButhelezi ukwi-Orlando Pirates, uNyama ukwiCape Town City.

UTeto, oneminyaka engu-20 nje kuphela, yena udayiselwe iqembu elidlala esigabeni esiphezulu eScotland, iLivingston FC.