UNurkovic uhalalisele isithandwa sakhe esingunobuhle sihlulwa kuMiss SA
Umgadli oke wadlala kwiKaizer Chiefs neRoyal AM, uSamir Nurkovic uke walibala kancane yibhola wayobungaza isinqandamathe sakhe esingunobuhle.
UNurkovic, owaziwa ngelikaKokota Piano ebholeni lakuleli, ubehambele umcimbi wonobuhle wokuqoka uMiss South Africa ngempelasonto.
Ubeyoseka intombi yakhe uBryoni Govender ogcine ephume isibili kulo mncintiswano wonobuhle.
UNurkovic, odabuka eSerbia, ube esefaka isithombe sakhe enalentokazi ezinkundleni zokuxhumana eyihalalisela ngempumelelo yayo.
“Ngiyaziqhenya kakhulu ngawe ndlovukazi yami 🔥❤️ #misssa2023 #pretoria #southafrica,” ubhale kanje lo mgadli.
Uhalalisela isithandwa sakhe nje uNurkovic yena akucaci ukuthi uzophelelaphi njengoba engenaqembu nje njengamanje. Useke wazama inhlanhla kwiCape Town City kodwa wachithwa.
Uke waya nakwiRaja Casablanca eMorocco kodwa akukaziwa ukuthi uhambe kanjani.
Nokho kungenzeka anyelwe yinyoni esandleni njengoba iFifa yayalela iRoyal AM ukuthi imkhokhele imali ebalelwa kuR12-million.
FUNDA NALA: UNtseki ucacisa eyokungadlali kukaRanga Chivaviro
Lokhu kulandela ukuthi leli qembu lesiqumama esidumile saseThekwini uShauwn Mkhize, lamxosha ngendlela engafanele.
