Uselitholile ikhaya elisha uKhama Billiat owaduba iChiefs
Alfred Ngubane
Sekuphelile ukuqagela ngokuthi uKhama Biliat wachizela iKaizer Chiefs nje eayethembeni.
Ngokusho kweChiefs, uKhama Billiat washiya isinyelela kuleli qembu, ehamba engavalelisile.
Ubephelelwe yinkontileka ekupheleli kukaJuni, iChiefs yamnika enye yokwelula kodwa yena wavele akangaphendula.
IChiefs yabe seyikhipha isitatimende imchaya kubantu ukuthi usephenduke uchakijana, uyidlalisa umacashelana.
Kodwa imenenje yakhe yamphendulela, ikhala ngokuthi leli qembu lixhopha abantu nje ngoba kumele ngabe likhuluma nayo (imenenja) hhayi umdlali.
Kodwa ke konke sekuphele kahle njengoba Impempe seyingakubika ngokungananazi ukuthi uKhama Billiat usezodlala kwiZamalek yase-Egypt.
Impempe inawo namaphepha enkontileka esisayiniwe phakathi kwezinhlangothi zombili, buka nawa la ngezansi.
Usayina nje lo mdlali ubeke wabonakala ezidlela ubusha nabangani bakhe maqede wabhala isitatimende ethi izintatheli zibhala ipolitiki ngaye.
UKhama Billiat wafika kuleli nge-Ajax Cape Town lapho agqama khona noThulani Serero noKeagan Dolly .
Wabe esedlulela kwiMamelodi Sundowns lapho egile khona izimanga ehlangene noKeagan Dolly noLeonardo Castro ngaphansi komqeqeshi uPitso Mosimane.
Indlela ababehlangene ngayo baze banikwa isiteketiso sokubabiza behlanganiswe kuthiwa yi-CBD.
Ube eseshiya kwiSundowns waya kwiChiefs la izinto ezifike zangahamba kahle nengoba eze wahamba kungasekuhle nje.
Kwale noma sekufike nomngani wakhe uKeagan Dolly, bazama ukuvuselela ubudlelwano babo kodwa kwala khona ukwenza.
Ukuya kwiZamalek kukaBilliat kusho ukuthi ubuyela ekudlaleni imiqhudelwano yase-Afrika kanti uzofica abadlali abambalwa bakuleli.
FUNDA NALA: Ibuye ‘nerepoti lakafestiye’ iRoyal AM ishaywa yiStellies, uMaduka uyalila
Kubona abagqamile uPercy Tau oyiphini likakaputeni kwiBafana Bafana noFagrie Lakay obegijima kwiSuperSport United neCape Town City.
