Useyilidovola kwiChampions League olaxazwe yiLeopards
Njabulo Shezi
Ube yisibonelo esihle sokuthi uma kuvaleka omunye umnyango, kwesinye isikhathi kuvuleka okukhiphela endaweni engcono umdlali waseMsinga u-Andiswa “Mlungu” Ndawonde.
Lesi sitobha singomunye wabadlali abalaxazwe yiBlack Leopards ngesikhathi idliwa yizembe kwiMotsepe Foundation Championship ekupheleni kwesizini.
Lokhu kwenzeke ekubeni kade esehlale kuyo iminyakanyaka. Kuthe noma iLeopards isithenga isitifiketi se-All Stars, yamshaya ngomzimba lo mdlali.
Uke waya ukuyozama kwiMilford FC yaseRichards Bay, kodwa kwabe sekuvela ithuba lokuyodlala eqenjini elidlala kwiCaf Champions League.
Ngokuthola kweMpempe, uNdawonde uzosayina kwiGaborone United yaseBotswana edlala kwiChampions League kule sizini.
“Bebembizile ngesikhathi bezodlala umdlalo wabo wokuqala kwiChampions League ngoMgqibelo ntambama.
“Bebefuna azohlangana nabaphathi, abone nesimo bese enquma ukuthi uyafuna yini ukusayina khona.
“Uzwakale ejabule ngakubonile futhi cishe uyabuyela nje kuleli viki elizoqala,” kusho umthombo osondelene nalo mdlali.
Uma esayina, uNdawonde uzodlala emizuliswaneni elandelayo kwiChampions League njengoba engabhaliswanga kule mizuliswano yokuqala.
FUNDA NALA: Uvaleliswe ‘ngempama’ eBolivia umgadli omusha weChiefs
Uzofica ubuso abujwayele eBotswana nengoba kukhona oThabo Rakhale, Sfiso Myeni noRooi Mahamutsa phakathi kwabadlali bakuleli abadlala kuleli lizwe elingomakhelwane.
