Uvaleliswe ‘ngempama’ eBolivia umgadli omusha weChiefs

Akubanga yindlela abengafisa ukuthi umdlalo wakhe wokugcina kwiReal Santa Cruz uhambe ngayo umgadli oza kwiKaizer Chiefs uJasond Gonzales.

Lo mgadli akakwazanga ukusiza iqembu lakhe liqhunyiswa ngempama ka 5-0 emdlalweni weBolivian Primera Division ngoMgqibelo ebusuku.

UGonzales uwuqalile lo mdlalo okuthiwa bekungowokuvalelisa kuye njengoba ngoMsombuluko ezobamba indlela eza kuleli.

Kodwa i-Oriente Petrolero ayimnikanga ithuba lokuvalelisa kahle njengoba ibaxine ngesibhaxu esibuhlungu.

Lokhu kusho ukuthi uGonzales akakwazanga ukwengeza emagolini ayisishiyagalombili abevele enawo kuleli qembu.

Nokuhlulwa kwalo kulisondeze endaweni yezembe njengoba selikweka-15 kwilogi anamaqembu angu-17.

IChiefs ikuqinisekise kuleli sonto ukuthi nebala seyimtholile umgadli ezoqinisa ngaye njengoba uGonzales ezobe esegijima kuyo maduze nje.

Ayicacisanga ke ukuthi imsayone ngokuphelele noma imbolekiwe njengoba kwakubikwe kanjalo ekuqaleni.

Kwabikwa ukuthi imthole ngokumboleka njengoba isafuna ukubona ukuthi unguye yini umgadli okucatshangwa ukuthi unguye.

IChiefs ivele iyamdinga umgadli ozokwazi ukuyishayela okungenani amagoli angu-13 kuya phezulu ngesizini.

Kuza uGonzales nje kusanda kuhamba uCaleb Bimenyimana obekunguye ohambe phambili ngamagoli kuleli qembu ngesizini edlule.

Khonamanjalo, amehlo azobe ebheke kuRanga Chivaviro ukuthi aqale ukuzikhombisa ngaphambi kokufika kukaGonzales uma iChiefs seyibhekene neTS Galaxy.

Amakhosi azovakashela leli qembu elinomkhuba wokulithwalisa kanzima eMbombela Stadium eNelspruit ngeSonto ngo-3 ntambama.

Leli qembu likaMolefi Ntseki likhombise izimpawu zokuthi kukhona okungcono elizokwenza kulokhu kule midlalo emithathu elisayidlalile.