UMammila ubike imbiba, wabika ibunzi iSundowns seyimenze njalo

UMorgan Mammila usagcizelela ukuthi mncane umehluko ophakathi kweChippa United neMamelodi Sundowns yize imgeze igilo imshaya ngo 2-0.

Yize abanye bengathi iSundowns ayizange ifike ezingeni layo ngokomdlalo, kodwa ikhombisile ukuthi iyingozi kanjani.

Lokhu ikwenze emdlalweni weDStv Premiership eNelson Mandela Bay Stadium eGqeberha ngoMgqibelo kusihlwa.

Amagoli ewashayile kulo mdlalo kube wubuhlakani bokukwazi ukubona ubuthaka kwiChippa, bese ibusebenzisa.

UMammila ukuvumile ukuthi iSundowns iwathole ngamaphutha abo amagoli ebashaye ngawo.

Igoli lokuqala lishaywe u-Aubrey Modiba ozithole engamakiwe ebhokisini leChippa ngomzuzu ka-36, walinamathisela enethini.

Emizuzwini emine ukusuka lapho, uJustice Chabalala ube neshwa ethi ukhipha umhlolo ekhaya kodwa ibhola lakhe layoqabula inethi yangakubo.

“Sikwenze konke obekusemandleni, ngiyabancoma abadlali ngoba balilandele kahle icebo lethu lokudlala,” kusho uMammila ngemuva komdlalo.

“Besingafuni ukunika iSundowns ithuba lokugcina ibhola isikhathi eside futhi besiyicindezele.

“Akukho la beyiphaselana khona ibhola ngokuthanda kwayo. Umehluko obe khona wukuthi iSundowns ibukhali phambili.

“Thina sisadinga ukuba bukhali. Lokho ke kuyinselelo ehlalele mina njengomqeqeshi ukuthi ngikulungise,” kuchaza lo mqeqeshi.

“Amagoli abo bawathole ngesikhathi singanakile emuva. Kodwa ke sisakha futhi sizoba ngcono kakhulu uma siqhubeka nokudlala kanje.”

Lokhu kunqoba kweSundowns kusho ukuthi isaqhubeka nokugqilaza njengoba isayinqobe yonke imidlalo yayo kule sizini.

Isinamaphuzu angu-12 kanti uma amanye amaqembu enganakile, izokuphinde ekwenze kumalasizini ayisithupha edlule.