Ngabe ukufika kukaMendieta kusho ukuphela ngoZwane?

Ukuqaliswa kukaJunior Mendieta ngaphambi kukaThemba Zwane ngesikhathi iMamelodi Sundowns ishaya iRichards Bay ngo 1-0 ngoLwesithathu kudonse amehlo.

Bekungokokuqala esikhathini eside uZwane, ongukaputeni kwiSundowns, engawuqali umdlalo.

Esikhundleni sakhe kuqale uJunior Mendieta osanda kufika kuleli qembu esuka kwiStellenbosch FC.

Lo mdlali odabuka eBrazil udlale kahle futhi nguye noshaye igoli iSundowns enqobe ngalo kulo mdlalo obuseKing Zwelithini Stadium.

UZwane ungene esiwombeni sesibili. UJunior Mendieta nguye oqokwe njengomdlali obevelele kulo mdlalo weDStv Premiership.

“Cha, uJunior Mendieta akazele lapha ukuzovala isikhala sikaThemba Zwane,” usho kanje umqeqeshi weSundowns uRulani Mokwena uma ebuzwa ngalokhu.

“Ngeke usivale isikhala sikaMshishi. Ungadlala engekho uZwane enkundleni kodwa ngeke uthi uze usivale isikhala sakhe.

“Unekhono elikhethekile, eliyivela kancane. UMendieta wenza sikwazi ukudlala ngezindlela eziningi ezihlukene.

“Yilokho okwenze simlande. Kunezinto anazo esizithandayo. Uyazinikela futhi uyazikhandla kanti ungumdlalo esingamdlalisa ezindaweni ezehlukene.”

UMokwena ukhulume nangendaba yabalandeli abangenelisekile kahle ngendlela iqembu elidlala ngayo, wathi yisikhathi okumele badlule kuso lesi.

“Ngifisa ngenhliziyo yami yonke ukuthi abantu baziqhenye ngaleli qembu ngoba ngiyazi kwesinye isikhathi kuba nomuzwa wokufuna okukhulu kunalokhu.

“Futhi lokho kulungile, kodwa ngesikhathi ufuna okukhulu, uMdali uthi awuke ube weneliseka ngalokhu akunike khona.

“Sesiside isikhathi sagcina ukunqoba imidlalo emihlanu kulandelana ekuqaleni kwesizini.

“Nginethemba lokuthi abantu bayakujabulela okwenziwa yilaba badlali nethimba eliqeqeshayo.”