Umdlali ochithwe yiChiefs kuseduze asayine kwiSiwelele FC
SIHLE NGUBO
Umdlali osanda kuchithwa yiKaizer Chiefs, uTebogo Potsane, kulindeleke ukuthi asayine eqenjini elisha kwiBetway Premiership, iSiwelele FC.
Leli qembu lithenge isitifiketi sokudlala kwiPremiership seSuperSport United osekuphelile ngayo ebholeni laseNingizimu Afrika.
Usihlalo weSiwelele FC, uCalvin Le John, oyindodana kaGayton Mackenzie, ungqongqoshe weZemidlalo, aMasiko naMaciko kuzwelonke.
UStanley Matthews, obeyisikhulu esiphezulu kwiSuperSport, usenesikhundla esifanayo kwiSiwelele.
Leli qembu lizoqeqeshwa uLehlohonolo Seema kanti uzosizana no-Andre Arendse njengephini lakhe.
UPotsane ufike kwiChiefs evela kwiRoyal AM ngaphambi kokuqala kwesizini ka-2023/2024.
Ungomunye wabadlali abachithwe yiChiefs okubalwa kubona uRanga Chivaviro, uSabelo Radebe, u-Edmilson Dove, uMduduzi Mdantsane, u-Edson Castillo, noBongani Sam.
UYusuf Maart, obengukaputeni weChiefs, udayiselwe iqembu lase-Austria, kanti uNjabulo Blom ubuyele eqenjini lakhe lase-USA, ebelimbolekise kwiChiefs ngesizini edlule.
UPotsane ubesasalelwe yisizini eyodwa neChiefs njengoba asayina inkontileka yeminyaka emithathu ngesikhathi efika ngo-2023.
Nokho lo mdlali ubehlushwa kakhulu ukulimala okwenze ukuthi angalitholi kahle ithuba lokuzobonakalisa kuMakhosi.
Ukwaze ukudlala imidlalo engu-19 kuphela egqoke imibala yeChiefs kuyona yonke imiqhudelwano.
Eyisishiyagalombili yale midlalo uyidlale ngesizini edlule, kanti bekubonakala ukuthi iChiefs izomchitha njengoba engayanga nayo eNetherlands ukulungiselela isizini entsha.
USeema kuvela ukuthi uyazifela ngoPotsane ngakho uzosayina nakanjani kuleli qembu.
ISiwelele izovula isizini ngokubhekana neLamontville Golden Arrows, emdlalweni weBetway Premiership, eDr Molemela Stadium, eBloemfontein, ngoMgqibelo ngo-8 ebusuku.
