Ikhonjwe indlela enye ‘ihluphist’ kuMaZulu
Alfed Ngubane
Seligcine ligqabukile igoda phakathi kwaMaZulu FC nomdlali wasesiswini osemncane onebhola elihle kodwa ohlulwa wukuziphatha.
USiphesihle Maduna ukhonjwa indlela nje kulandela ukungagculiseki komqeqeshi uPablo “Cijimpi” Martin ngalo mdlali.
Sekukudala ke limlandela lelishwa lokukhonjwa indlela uMaduna njengoba asinda emlonyeni wengwenya ngesikhathi kufika uBenni McCarthy.
Lo mqeqeshi wacela ukuthi abuyiswe ngoba kukhona okuhle akubona kuye. UMaduna ukhulele enkulisa yaMaZulu kanti wakhushulelwa eqenjini elikhulu nguCavin Johnson.
Ubethembisa njengoba wagcina esedonsa iso likaPitso Mosimane ngesikhathi esaqeqesha iMamelodi Sundowns.
Kodwa ke ube esengenwa yidimoni elibi lokuthanda ubumnandi nempilo yasebusuku, eselimoshe inqwaba yabadlali kuleli.
Ngokuhamba kwesikhathi ube esehlelwa yizinga lokudlala njengoba ubesebonakala ukuthi akukho ukuzimisela emsebenzini wakhe.
Uhamba nje ulandela abanye abadlali abakhonjwe indlela kuMaZulu ngenxa yakho ukuhluleka ukuziphatha ngendlela efanele.
Labo badlali ngoDumisani Zuma noGabadinho Mhango asebekwiMoroka Swallows manje la uSteve Komphela ethi uzobakhona yena.
FUNDA NALA: Ufuna iPirates iyibethele iDjabala ‘egolozayo’ e-Orlando
Naye ke uMaduna kungenzeka ajoyine bona kwiSwallows njengoba kuke kwavela ukuthi icuthile ukuthi imnqake uma eke wadedelwa eThekwini.
