UBarker uneqhinga lokuvalela uLepasa wePirates ebhodleleni

Njabulo Shezi

Umqeqeshi weStellenbosch FC, uSteve Barker uthi bazophatha ibhodlela elincane abazovallea kulo umgadli we-Orlando Pirates uZakhele Lepasa.

Lamaqembu azogadulisana e-Athlone Stadium emdlalweni womlenze wokuqala kweyandulela owamanqamu kwiMTN8  ngeSonto ntambama. 

UZakhele Lepasa uwashaya ngathi ushunqiselwe ngenethi amagoli kule sizini kanti uBarker uyavuma ukuthi uzoba wuhlupho. 

Umazi kahle ke uBarker lo mgadli njengoba ake wasebenza naye ebolekisiwe isikhashana ngesizini ka-2018/19. 

“Ngimjabulele kakhulu uZakhele Lepasa (ngokushaya kwakhe amagoli),” kusho uBarker. 

“Wake wafika la eqenjini izinyanga eziyisithupha ebolekisiwe. Ngaleso sikhathi u(Iqraam) Rayners wayenza kahle kakhulu ngakho kwaba nzima ukuthi athole ithuba. 

“Khona omunye obengikhumbuza nje ezinsukwini ukuthi sengike ngaba nabagadli abaphambili eqenjini, o-Ashley Du Preez, Lepasa noRayners.

“Ngimtshelile ukuthi kumnandi uukusebenza nabadlali abakwaziyo ukushaya igoli, futhi uZakes ungumfana ozikhandlayo ngaso sonke isikhathi. 

“Ungumdlali onekhono futhi owuhliniphayo umsebenzi wakhe futhi uwenza ngokuzimisela ngaso sonke isikhathi. 

“Nangesikhathi elapha wayezikhandla. Ngicabanga ukuthi lokhu kulimala abe nakho kuke kwamphazamisa, koda usedlulile kukho. 

“Uke wagxekwa nangabalandeli futhi udlala kahle ngale ndlela adlala ngayo, kumele simncome ngalokho,” kuchaza uBarker. 

Lo mqeqeshi uthe bayamazi uyingozi ngakho kuzomele bamqaphe umdlalo uqala uze uyophela.

“Siyamazi uyingozi… Uyakwazi ukuqedela amathuba. Udlala ngokuzethemba  ngakho kuzomele simgadisise impela.

FUNDA NALA: UNtseki ukhala ngokudedela kweChiefs igoli isekhaya

“Ngimjabulele impela ngendlela adlala ngayo, kodwa kumele simvalele ebhodleni kulo mdlalo. Uyena, u(Monnapule) Saleng no(Patrick) Maswanganyi bayinkinga impela.”