Okusha ngesigwebo sikaLorch owamuhluza owesifazane

Kuphinde kwahlehliswa ukukhishwa kwesigwebo sikaThembinkosi Lorch owalahlwa yicala lokushaya owesifazane ngesihluku.

ULorch, odlala kwi-Orlando Pirates, ubesenkantolo kaMantshi yaseRandburg, eGoli ngoMsombuluko la bekulindelwe athole isigwebo sakhe.

Nokho kuvela ukuthi abammeli bakhe baphinde bacela esinye isikhathi sokuyo lungisa okuthile ngaphambi kokwenza izethulo zabo.

Abammeli kulindeleke benze izethulo zomushweleza, becela ukuthi ashaywe ngoswazi oluncane lo mdlali oneminyaka engu-30.

Njengoba leli cala lingakapheli, uThembinkosi Lorch akadlali kwiPirates yize ejima neqembu.

Leli qembu lakhipha isitatimende lithi lizolinda kuphume isigwebo ngaphambi kokubona ukuthi lona limisa kanjani ngaye.

Ulahla yicala nje kuthiwa washaya uNokuphila Mathithibala owayeyintombi yakhe ngoba bexabene.

Ngesikhathi elahlwa ngecala, inkantolo yathi akakhombisanga ukuzisola futhi nobufakazi bakhe babunamanga amaningi.

Icala selizophinde libuyele enkantolo ngo-Okthoba ngosuku olusazokhishwa yinkantolo ngokuxhumana nabammeli bakhe.