Asesivalile isikhundla somxumanisi AmaZulu

AmaZulu FC asegcine esivalile isikhala esavuleka kuhamba uPhumlani Dube ezinyangeni ezidlule.

Usuthu lumemezele ukuthi seluqashe uPhilani “Pro-Philani” Ndlela ukuthi abe yiPublic Relations Officer yalo.

Ungena esikhaleni sikaDube oshiye AmaZulu kungasekuhle ngesizini edlule.

Kwavela ukuthi uDube waxabana naboSuthu ngesikhathi kunemidlalo yeCarling Black Label Cup eGoli nyakenye.

Kwaba nezinsolo zokuthi uDube wabeka isandla owesifazane osebenza kuwona AmaZulu, waziphika.

Wazivikela ngokuthi lo wesifazane wayedakiwe futhi ekhuluma yonke into ayithandayo ngaye, emlwisa.

Akagcinanga lapho uDube ngoba waphinde waveza ukuthi kunenkinga yotshwala kubadlali baMaZulu.

Lokhu waqale wakuphika umengameli woSuthu uSandile Zungu.

Kodwa wabuye wakuvuma kwavela ukuthi bakhona abadlali abebebuhlaba kuMaZulu kanti begcine bekhonjwe indlela.

UDube noSuthu bake basikazana ngokuyisana enkantolo kwacaca ukuthi ibisishiphelene kakhulu.

Ngaleso sikhathi uDube wayevele esehambile kuMaZulu kodwa bekulokhu kuchukuluzwana kwabezindaba nasezinkundleni zokuxhumana.

UNdlela kulindeleke ukuthi aqale maduze kuMaZulu njengoba evele esethuliwe ngokusemthethweni.

Nokho imidlalo yeDStv Premiership isamile njengoba kuyikhefu lemidlalo yeFifa emhlabeni wonke.