Igidigidi uNgezana eshaya igoli lokuqala kwelaseRomania
Indlela izinto esezimhambela kahle ngayo, usungaphika ukuthi uSiyabonga Ngezana uke wanengcindezi ngendlela yokuthi abaphathi kwiFCSB bese becabanga nokumbuyisa.
UNgezana, oneminyaka engu-25 usengene khaxa esitayeleni kuleli qembu laseRomania elidlala esigabeni esiphezulu.
Ufike kuleli qembu ngoJulayi esuka kwiKaizer Chiefs okuthiwa yamdayisa ngemali ebalelwa ku-R12-million.
Indlela adlala kahle ngayo seyenze abaphathi abangangabaza ukuthi maduze kuzovela amaqembu amakhulu ase-Europe ezimlanda, badle imali enhle ngaye.
Uphinde wadlala kahle nangoLwesihlathu kusihlwa beshaya iFC Bihor ngo 2-0 emdlalweni weCupa Romaniei.
UNgezana nguye oshaye igoli lesibili kulo mdlalo, engqofela phakathi ibhola obekade kuyikhona ngomzuzu ka-69.
Ngaphambi kwalo mdlalo, umengameli weFCSB uGigi Becali ubencome lo mdlali, ethi uzomngenisela izizumbulu zemali uma esemdayisa.
“Ngifuna ukulanda inqwaba yabanye abadlali e-Afrika,” ucashunwe esho kanje uBecali ngabeDigiSport yakhona eRomania.
“Sizokwenza okufanayo neBotosani, sibe nabadlali abayisikhombisa base-Afrika enkundleni.
“Angisenendaba neBrazil, sengibheke eNingizimu Afrika kuphela manje. Ababizi kakhulu lakhulu laphaya… Uke wambona uNgezana?
“Uyalazi ibhola! Njengamanje usafika ekudlaleni e-Europe futhi usanokwethuka kodwa awumlinde abuyelwe yisibindi sakhe.”
FUNDA NALA: Ungene kwajika izinto u-Ox kwiChiefs ishaya iSekhukhune
Akasiphoxanga ke lesi sikhulu uNgezana njengoba engeze ngegoli ekudlaleni kahle kwakhe futhi kuyacaca usevulele nabanye amasango kuleliya lizwe.
Kuvele ke kwake kwavela ukuthi leli qembu lalifuna noReeve Frosler kodwa iChiefs yangathanda ukumdedela lo mdlali okwamanje.
Kusuke igidigidi ke ezinkundleni zokuxhumana kuleli abalandeli bembongela lo mdlali wasemuva ngokuhanjelwa kahle izinto emazweni.