Ubuyele ekujikeni nelanga uKhama Billiat, kumbhedele e-Egypt

Alfred Ngubane

UKhama Billiat uvuka athamele isigcaki njengoba esebuyele ekubeni uqhwayilahle ngakubo eZimbabwe. 

Ngokuthola kweMpempe ngomthombo wayo, uBilliat uhlangane nezimbila zithutha, ziholwa emhlophe phambili kwiZamalek SC yase-Egypt la abesethole khona itoho. 

Kuthiwa ngaphambi kokuthi asayinwe, unikwe ithuba lokuzicija neqembu nala kuvuke khona isenyelo sakhe esidala abephila naso kwiKaizer Chiefs. 

“Babe sebemthatha abaphathi beqembu bamyisa kodokotela, bafike bathola ukuthi ukulimala kwakhe kunengcuphe yokuthi kungaqeda ngaye ebholeni.

“Kusamele athathe isikhathi eside ukuze aphole kahle futhi alunge ukudlala ezingeni eliphezulu,” kusho lo mthombo. 

Uqhube wathi abaphathi beZamalek bakhala nangemenenja yakhe uGodfrey Bakasa bethi ayibatshelanga iqiniso ngokulimala kwalo mdlali. 

“Kwabadina abaphathi beqembu, bagcina ngokuthatha isinqumo sokuthi bamdedele, bayihoxisa inkontileka ababemnike yona.”

UBilliat njengamanje unguqhwayilahle nabanye abadlali abanegama kwiPSL okukhona kubo oNsikelelo Nyauza, Happy Jele no-Eric Matoho. 

FUNDA NALA: Asesendalini, angase asheshe aphele amathikithi owamanqamu weMTN8

Kumbhimbela kanjena nje uBilliat wahamba engavalelisile kwiChiefs ngoba ecikwa wukuthi inkontileka ebimnika yona beyiyehlisa imali azoyihola.