‘Uyofundiswa umsebenzi’ kabusha unompempe obambe iChiefs ngophondo
Sihle Ngubo
ISouth African Football Association (Safa), seyimise unompempe uLuxolo Badi ngokuhluleka ukunika iKaizer Chiefs iphenathi emdlalweni weMTN8, ibhekene neMamelodi Sundowns.
Ngokombiko weKick Off iSafa ilucubungulile udada yase ithatha isinqumo ngoBadi, nesigameko somdlalo weMTN8.
Lo nompempe wathalalisa uMduduzi Mdantsane ekhahlelwa ebhokisini emdlalweni womlenze wesibili weMTN8 owagcina uwinwe yiMamelodi Sundowns ngo 2-1 yase idlulela phambili ngo 3-2 sekuhlanganiswe imilenze emibili.
“Unompempe usefakwe ohlelweni lokuhlumelelisa oluzothatha amaviki amane,” kusho u-Abdul Ebrahim oyinhloko yonompempe kwiSafa.
“Lokhu ke kuchaza ukuthi ikomiti lethu lizothumela abahloli abazosebenza naye kula maviki, ngokomzimba wakhe kanjalo nangendlela athatha ngayo izinqumo.
“Uma esephelile amaviki amane bazothumela umbiko ehhovisi ukucacisa ukuthi yini eyenziwe, nokuthi angase abuye nini.
“Kuzobe sekuthathwa isinqumo sokuthi uzobuyela ngqo yini kwiDStv Premiership noma uzoqale ayodlalisa kwiFirst Division, ukuze anikwe umdlalo owodwa wokuzizwa.
FUNDA NALA: Ubuyele ekujikeni nelanga uKhama Billiat, kumbhedele e-Egypt
“Konke lokhu kuzokwenzelwa ukuthi abuyele esigabeni esiphezulu vele. Ukuhlunyeleliswa kwakhe kuzoqala ngoLwesibili.”
