Asesheshe aphela amathikithi owamanqamu weMTN8
Amathikithi omdlalo wamanqamu weMTN8 ka-2023/24 phakathi kwe-Orlando Pirates neMamelodi Sundowns aseyayiswe aphela emahoreni angu-18.
La mathikithi aqale ukuthengiswa ngo-3 ntambama ngoLwesine, abe esephele wonke ngo-9 ekuseni ngoLwesihlanu, ngokusho kwePSL.
Umdlalo wamanqamu weMTN8 uzodlalelwa eMoses Mabhida Stadium ngoMgqibelo womhla ka-7 ku-Okthoba.
Amasango azovulwa ngo-2 ntambama. kanti abanikazi bamathikithi bayacelwa ukuthi bafike kusenesikhathi ukuze baqinisekise ukungena kahle.
I-PSL isebenzisana ngokubambisana noMbutho Wamaphoyisa aseNingizimu Afrika nabanye bezokuphepha ukuze kuqinisekiswe umcimbi ophephile futhi ovikelekile.
Njengengxenye yezinyathelo eziqinile zokuphepha enkundleni yezemidlalo, abantu abenza izinto ezingekho emthethweni njengokuthengisa amathikithi bazoboshwa ngokushesha.
Ngeke adayiswe amathikithi enkundleni yezemidlalo.Amalungu omphakathi anesifiso sokuthenga amathikithi omntakabani angathinta iMoses Mabhida Stadium kwi-email ethi: Musawakhe.Cele@durban.gov.za
FUNDA NALA: UPierre Issa uhlambuluka ngegoli alishaya ngakubo kwiBafana
Umdlalo uzobe ubukhoma kuSuperSport PSL Channel (202) nakuSABC Sport.
