Ziphekwa ngomhluzi wenye izindebe kwiPSL

Liyabuya idili lezindebe kwiPSL (Premier Soccer League) njengoba indebe ebingekho kule minyaka emibili edlule seyibuya nayo.

Le ndebe edlalelwa amaqembu adlala esigabeni esiphezulu kwiPSL, iDStv Premiership isizobuya seyixhaswe yiBlack Label.

IPSL seyimeme abezindaba emhlanganweni la iCarling Black Label Knockout izokwethulwa khona bese kuqhathwa anamaqembu ngeviki elizayo.

Kulindeleke iqale uma kwethwasa inyanga ezayo okuwuNovemba kanti kuzobe kungakapheli nenyanga kusongwe iMTN8.

ICarling Black Label ithathe indawi yeTelkom okwakuyiyo eyayixhase lo mqhudelwano phambilini ngaphambi kokuqeda ukudlelwano nePSL.

Le ndebe, ebangwa amaqembu adlala kwiDStv Premiership kuphela, izolandela ezithendeni zeMTN8 efika kuvuthondaba ngoMgqibelo.

Kuzohlangana i-Orlando Pirates neMamelodi Sundowns kowamanqamu eMoses Mabhida Stadium eThekwini ngoMgqibelo. Umdlalo uqala ngo-6 kusihlwa.

Ngemuva kwayo kuzobe sekulandela iCarling Black Label Cup, okuzothi nayo uma isongwa ngoFebhuwari, bese kuqala iNedbank Cup.

Kuzothatha amehlo ke ukubona ukuthi iSundowns ingasenza yini isimanga izigwinye zonke lezi zindebe zakuleli njengoba ingashayeki nje.