UNcikazi ukhipha ‘iqiniso’ ngokuzuza kweSundowns konompempe
ALFRED NGUBANE
Iphini lomqeqeshi kwi-Orlando Pirates, uMandla Ncikazi usezwakalise ukukhathazeka ngezinqumo zonompempe ezivuna iMamelodi Sundowns kule sizini.
UNcikazi uzwakalise ukuthi unethemba lokuthi onompempe ngeke bakuphinde lokho uma iPirates isibhekene neSundowns kowamanqamu weMTN8.
Lamaqembu azobhekana eMoses Mabhida Stadium, eThekwini ngoMgqibelo ngo-6 kusihlwa.
UNcikazi umisiwe emdlalweni wamanqamu weMTN8 ngemuva kokuthola ikhadi elibomvu emdlalweni odlule phakathi kwala maqembu.
Ukuphatheka kabi kwakhe kudalwe yiphenathi esuse umsindo eyanikwa iSundowns ngesikhathi uThemba Zwane ebonakala ekhubeka engaphakathi ebhokisini.
ISundowns iphinde yahlomula ngesinqumo esishubile ngesikhathi inqoba kwiKaizer Chiefs kowandulela owamanqamu kwiMTN8 ngesikhathi iChiefs ingabekelwa iphenathi.
Isinqumo sikanompempe uLuxolo Badi sisuse inkulumompikiswano, ngemuva kwalokho wafakwa ngaphansi kohlelo lokuhlunyeleliswa kwezimilo yibhodi leSafa lokuqondiswa izigwegwe.
“Ukuze ibhola lethu likhule, angisho ukuthi ngiyisihlakaniphi kunawo wonke umuntu noma lapha ezweni,” kusho uNcikazi.
“Kodwa iqiniso nali phambi kwethu sonke. Ngethemba ukuthi iqiniso nokungenzeleli yikho okuzohamba phambili ebholeni lethu.
FUNDA NALA: Imenenja ichitha izinsolo ngomdlali ‘ofuna ukuhola engadlali’
“Ingaqhubeki lento esiyibonayo sonke kodwa esenza sengathi asiyiboni. Ngiyabona senivele nathula nya ngoba nakhu ngikhuluma iqiniso.
