Ufunwa awaseLimpopo umqeqeshi ogxalwe yiMilford

ALFRED NGUBANE

Abaphathi beMilford FC bathi bazokwenza isimemezelo ngeviki elizayo ngodaba lomqeqeshi kulandela ukumiswa kuka-Asanda Mvalo kuleli qembu. 

UMvalo nethimba lakhe bamiswa kulandela imiphumela engemihle eqenjini, kanti kuze kube manje alikamqashi omunye umqeqeshi. 

Impempe isithole ukuthi ngesikhathi leli qembu lisadingida udaba lomqeqeshi, usihlalo u? Pupuma uzibambele ngokwakhe umsebeni wokuqeqesha.  

Nokho ucashise ngoNhlanhla Hlongwa okunguye okuthiwa uyaqeqesha kodwa zonke izinqumo ziphuma kuPupuma. 

Kuvela nokuthi leli qembu seliyakungabaza ukususa kwalo uMvalo njengoba kungenzeka abuyiselwe emsebenzini wakhe. 

Nokho kungenzeka ke ifike ingasamtholi, esethathe umsebenzi waseLimpopo njengoba kunamaqembu amabili amfunayo khona. 

Impempe isingakudalula ukuthi amaqembu amabili aseLimpopo, iBlack Leopards neVenda Football Academy asezivezile izifiso zokumthatha lo mqeqeshi osemncane. 

“Angazi noma yinhlanhla noma yini lento yakhe. Uyaye uzwe uma kuthiwa ukuwa kwenye indlu, kusho ukuvuka kwenye? 

“Yena ke kuvuke ezimbili ekubeni kwale endala ayikakawi ngoba usangabuyela kuyo,” kusho umthombo. 

“IMiford ayisacacisi ukuthi uxoshiwe ngampela yini kanti siyezwa ukuthi kungenzeka abuyiselwe emsebenzini wakhe. 

“Kodwa manje sekuvele iVenda neLeopards ngokwehlukana bezomeshela kanti kuzoncika kuye ukuthi uyakuphi.”

Kuthiwa uMvalo akanankinga nokuya kulamaqembu, kodwa ufuna ukuhamba noDoctor Mkhonza ayosebenzisana naye.

“Abaphathi bakhe bamtshelile ngalamaqembu. Uthe yena ufuna ukuhamba noDoctor Mkhonza… 

FUNDA NALA: Ngabe luyagoba kwiPSL ngokungena kweDowns kwiSuper League?

“IVenda cishe izomwina ngoba yona ayinankinga uma efika nephini lakhe, iLeopards yona ifuna azosebenza ngokubambisana noMongezi Bobe azomfica phambili.”