Chiefs v Pirates: Asesemakethe amathikithi edabhi yaseSoweto
Kusasele ngaphansana kancane kwenyanga kufike usuku lomdlalo, kodwa iKaizer Chiefs isikuvulele ukudayiswa kwamathiki edabhi yaseSoweto la izobhekana khona ne-Orlando Pirates.
Amathikithi edabhi yaseSoweto, okungumdlalo ohlezi ubhekwe ngabomvu kuleli, avamise ukusheshe aphele.
Lo mdlalo uphenduka omunye wemicimbi ephambili kuleli kanti nakulokhu akukho okuhlukile njengoba abalandeli sebevele beqalile ukukhuluma ngawo.
Usuku lwalo mdlalo womlenze wokuqala kwiDStv Premiership kule sizini, uzoba seFNB Stadium ngoMgqibelo, mhla ka-11 kuNovemba.
Ngaphambi kwalo mdlalo womabili la maqembu anemidlalo okungenani emithathu okumele ayidlale okuhlanganisa nowomqhudelwano osanda kwethulwa, iCarling Knockout Cup.
IChiefs izokwamukela AmaZulu ngosuku olusazomenyezelwa yiPSL emzuliswaneni wokuqala walo mqhudelwano.
IPirates nayo iyobe isekhaya uma isibhekene nabafana abasha kwiligi, iCape Town Spurs. Womabili la maqembu anemidlalo yeligi ngaphambi kwedabhi yaseSoweto.
Kodwa kulabo abafuna ukuba yingxenye yalo mdlalo, amathikithi aseyatholakala ezitolo, ngokusho kweChiefs ngoLwesihlanu ntambama.
Amathikithi aqala ku-R100 kuya ku-R170. Atholakala eTicketPro nezinye izitolo ezahlukene, okuhlanganisa eSpar, Boxer, Sasol, Shell nasePostNet.
Uma ufisa ukungena kwiKaizer Chiefs Family Zone ekhethekile, exhaswe yiJohn Deere, amaphakheji atholakala ngenani lika-R350 kuya ku-R550.
Kuphinde kwenziwa amalungiselelo ayisipesheli ngabantu abakhubazekile nabazali abanezingane ezineminyaka engaphansi kuka-12.
Lamathiki wona atholakala ngokuthi uxhumane nabeTicketPro ku: info@ticketpros.co.za.
Ukuze uthole ulwazi oluphelele lwamathikithi, okuhlanganisa nemininingwane mayelana ne-Hospitality suites, qiniseka ukuthi uvakashela iwebhusayithi ye-TicketPros ethi www.ticketpros.co.za.
FUNDA NALA: Kungani izimanga zikaChaine zingamthusi uKomphela
Khonamanjalo, iChiefs inxuse abalandeli bayo ukuthi basheshe bawathenge amathikithi ukuze baqinisekise ukuthi benza iqembu labo lizizwe njengeqembu lasekhaya ngalolu suku.