Selukhishiwe usuku lokufihlwa kukaBongi Ntuli
SIHLE NGUBO
Uzofihlwa ngoLwesine umgadli waMaZulu FC, uBonginkosi “Mdeva” Ntuli, odlule emhlabeni kungalindele muntu ngempelasonto.
Ngokwesitatimende soSuthu uNtuli ubexinwe yisifo somdlavuza esimsheshisile impela njengoba ehlale esibhedlela izinsuku ezinhlanu, kwase kumenela.
Inkonzo yesikhumbuzo izobanjelwa eMoses Mabhida Stadium, eThekwini, ngoLwesithathu ngo-3 ntambama.
Usuthu lunxusa labo abake badlalela iqembu ukuthi baxhumane nalo uma benesifiso sokuba yingxenye yale nkonzo.
Kulabo abakude inkonzo izovezwa kwi-live stream, bakwazi ukubona konke okuzobe kwenzeka.
AmaZulu azodlala umdlalo olandelayo weDStv Premiership neLamontville Golden Arrows ngeSonto.
La maqembu atholanile emdlalweni we-quarterfinal weBlack Label Knockout, kwawina AmaZulu ngo 3-0 ngoMgqibelo.
Usuthu lunethuba lokudlulela kowamanqamu njengoba luzobhekana neTS Galaxy kowandulela owamanqamu ekhaya.
FUNDA NALA: Isukile ‘ezembeni’ iPirates ishaya iSekhukhune
Komunye umdlalo kuzotholana iStellenbosch FC neRichards Bay FC. Owamanqamu ungoDisemba 16 eMoses Mabhida Stadium.
