Omunye umlando iSundowns iba ngompetha bokuqala be-AFL

Ingene emabhukwini omlando webhola lase-Afrika iMamelodi Sundowns inqoba iCaf African Football League.

Leli qembu lasePitori lishaye iWydad Athletic Cassablanca yaseMorocco ngo 2-0 emdlalweni wamanqamu eLoftus Stadium ngeSonto ntambama.

Kube u 3-2 sekuhlanganiswe imiphumela yayo yomibili imilenze yalo mdlalo wamanqamu.

ISundowns izehlisele isisindo salo mdlalo ngokuthi kuyiwe ekhefini seyilitholile igoli kulo mdlalo oqale ngegiya elibi.

ISundowns beyidlala yodwa njengoba abeWydad bebewa njalo, bathathe isikhathi ukusukuma bezenza abalimele.

Lokhu kwenze kwengezwa imizuzu engu-12 ekupheleni komdlalo. Yilapho ke elishaye khona igoli iSundowns.

UThemba Zwane udedele ishodi engaphandle kwebhokisi, walivimba unozinti kodwa lawela phambi kukaPeter Shalulile.

Lo mgadli obuya ekulimaleni akazange esabuza kaningi, walinamathisela ophahleni lwenethi.

Kuthe iWydad isazitshela ukuthi isimo asisibi kakhulu, waqhamuka u-Aubrey Modiba wadabula isitobha seWydad qede waliphambanisa nonozinti.

UShalulile ulitholile elinye ithuba lokwengeza amagoli, kodwa wahluleka esebheke ngqo nonozinti, wavele wamupha lona ibhola.

IWydad nayo ibe seyivuka ke emaqandeni, isibona ukuthi isikhathi siyancipha futhi kuyacaca indebe izosala.

Nokho imizamo yayo iyiqale sekuze kwakubi kakhulu, yagcina ilugobile uphondo, yabuyela ekhaya inyobozela.