EzakamuvaiDStv Premiership

Isikhishiwe imiklomelo yabenza kahle kwi-PSL

IPremier Soccer League (PSL) isidalule abawine imiklomelo yanyanga zonke ka-Agasti noSepthemba/Okthoba, ibungaza amagalelo abo ebholeni laseNingizimu Afrika.

Umqeqeshi weMamelodi Sundowns, uRulani Mokwena, uthole indondo yoMqeqeshi oVelele ka-Agasti. 

Lo mqeqeshi oneminyaka engu-36 uhole iqembu lakhe ekuqaleni kahle isizini ka-2023/24. 

ISUndowns inqobe imidlalo eyisithupha, yashaya amagoli angu-13, yangenelwa amabili kuphela emidlalweni eyisithupha. 

Phakathi kwamaqembu athola isibbhaxu seSundowns ngenyanga ka-Agasti kukhona iKaizer Chiefs, Golden Arrows neChippa United.

ULucas Ribeiro, obesemusha kwiSundowns, yena uthole umklomelo woMdlali oVelele wenyanga ka-Agasti. 

Lo mgadli odlala ngonyawo lwesokunxele, wahlaba umxhwele ngamagoli amane emidlalweni eyisithupha. 

Lo mklomelo ubewubanga nozakwabo ongunozinti uRonwen Williams nomgadli wePirates uZakhele Lepasa.

Umdlali weKaizer Chiefs, uPule Mmodi, yena unthole indondo evotelwa ngabalandeli, eyeGoli leNyanga ngo-Agasti. 

Lo mklomelo uwuthole ngegoli lakhe elihle alishaya bebhekene neStellenbosch FC.

NgoSepthemba/Okthoba, uMabhuti Khenyeza, umqeqeshi weGolden Arrows, nguye obaqwaqwade emakhanda, uthole indondo yokuba nguMqeqeshi oVelele kulezi zinyanga. 

UKhenyeza uyihole ngendlela encomekayo i-Arrows njengoba ingahlulwanga kulezi zinyanga. 

Washaya iSekhukhune United, iKaizer Chiefs, neCape Town Spurs. Kulesi sikhathi i-Arrows ishaye amagoli amane, yangenelwa elilodwa vo.

UBradley Grobler uthole isicoco soMdlali eNyanga kaSepthemba/Okthoba, kwathi igoli likaSamir Nurkovic weTS Galaxy laqokwa njengelihle kunawo wonke. 

FUNDA NALA: USeema uveza okumshiyise kwiPolokwane

Lo mgadli odabuka eSerbia walishaya bebhekene neSekhukhune United leli goli elimnqobise indondo.