Usola uMotsepe owahlukunyezwa eMabhida, ufuna axolise
SIHLE NGUBO
Ufuna kuxoliswe kuyena kubuka lonke izwe umfundisi uNtuthuko Nkosi, okhala ngokuhlukunyezwa eMoses Mabhida Stadium, eThekwini, ngempelasonto edlule.
UNkosi uthi wayeyobuka umdlalo phakathi kweBafana Bafana neBenin ngoNovemba 18, wase ethola ukungaphathwa kahle abeCaf, onogada namaphoyisa eSAPS.
“Ngangiyokwethamela umdlalo weCaf phakathi kweBafana Bafana neBenin, eMoses Mabhida Stadium, ngoNovemba 28.
“Ngangimenywe endaweni yezicukuthwane ekuLevel 5 eduze kwePresidential Suite,” kulandisa uNkosi esitatimendeni sakhe.
“Entanyeni ngangigaxe iKeffiyeh (iduku) yasePalestine, ngiphethe nefulegi lakhona.
“Ngesikhathi ngisayina ngaphambi kokungena, umengameli weCaf, uPatrice Motsepe wayekhona, ngambona eshayela umnini webhokisi amasayini ukuthi angitshele ngikhumule iKeffiyeh yami, futhi ngingaliphakamisi ifulegi lasePalestine.
“Waphuma imizuzu embalwa, wase ebuya nonogada abahlanu ababegqoke amasudu amnyama.
“Bangicela ukuthi ngibanike ifulegi lasePalestine, bathi ngingalithatha kubona ngemuva komdlalo.”
Uthi ekupheleni komdlalo wazithola esephekwa ngemibuzo amaphoyisa, esolwa ngokuzama ukususa uthuthuva kulo mdlalo.
“Ngesikhathi sekuphele umdlalo ngaya ehhovisi lonogada lapho ngafica kunamaphoyisa ayegqoke umfaniswano weSAPS.
“Kodwa omunye wayezigqokele nje izingubo zakhe kodwa ngacabanga ukuthi naye uyiSAPS.
“Wabe esengiqonda ebuza ukuthi bengilisaphi leli fulegi emdlalweni webhola.
“Ngaphendula ngokuthi lona umdlalo weFifa futhi iPalestine iyingxenye yeFifa.
“Wabe esevumelana nalokhu engangikusho kodwa wakugcizelela ukuthi ngenxa yezinxushunxushu ezikhona manje ePalestine, akukuhle ukuthi ngiphakamise leli fulegi emdlalweni webhola ngoba kungadala udlame.
“Bathi angithathe ifulegi lami ngiphume enkundleni.”
IBafana yagcina iwine lowo mdlalo ngo 2-1, yaqoqa amaphuzu amathathu abalulekile njengoba kwakuwumdlalo wokuhlungela iNdebe yoMhlaba.
“Ngifisa ukuthi lolu daba lubhekwe kahle ngoba lulwisana nenkululeko yami yokweseka abantu abacindezelekile.
“Ngingathanda ukuthi iCaf ixolise kimina kubona wonke umuntu, kanjalo nenkampani yonogada abathatha ifulegi lami,” kusho uNkosi.
“ISouth African Police Service (SAPS) nayo ngifuna ixolise ngoba iyona okumele ivikele amalungelo abahlali.
“Nokho kulokhu ngikholwa ukuthi inkululeko yami yokweseka izwe elicindezelwe ngayephucwa.
FUNDA NALA: UGabuza ubike usizi enkantolo, yamzwela imantshi ngebheyili
“Ngiyakuqinisekisa ukuthi konke okubhalwe lapha kuyiqiniso lakho konke okwenzeka eMoses Mabhida, ngoNovemba 18.”
Nokho Impempe ithole ukuthi uMotsepe wayengekho eMabhida ngelanga lesigameko kwazise wayenomhlangano weCaf e-Ivory Coast ngalolo suku.
