UManenzhe usola awePSL ngokuvulela iDowns uthelawayeka
SIHLE NGUBO
Kuzifanela nokuthi amaqembu eDStv Premiership avele ayivulele uthelawayeka womgwaqo iMamelodi Sundowns, ngokubona kukaPhumudzo Manenzhe.
UManenzhe, ongumhlaziyi nomsakazi webhola kwiSuperSport TV, ubona amaqembu ePremiership eyidedela kalula iMamelodi Sundowns ukuthi iwine.
UManenzhe ubekhuluma ngemuva kokuthi iSundowns ishaye iSuperSport United ngo 2-0 emdlalweni weDStv Premiership ngoLwesithathu ebusuku.
Lokhu kwenze leli qembu laqopha umlando ngokuwina yonke imidlalo eyisishiyagalolunye yeligi. Iphule irekhodi leKaizer Chiefs eliyimidlalo eyishiyagalombili.
“Inkinga ngamanye amaqembu ukuthi awanawo nhlobo umgqigqo. Esekhundleni sokuthi awine imidlalo yawo avele afune ukushaya iSundowns,” kusho le ngwazi eyayigijima kwi-Orlando Pirates.
“Ngakolunye uhlangothi iSundowns izama ukuyiwina yonke imidlalo yayo. Uma idlala nawo la maqembu angenamgqigqo iphinde iwine.”
Njengamanje kubukeka sengathi iSundowns izophinde isiqukule kalula isicoco seligi. Emidlalweni eyishiyagalolunye inamaphuzu angu-27.
Amaqembu asedlale imidlalo eminingi kuneSundowns asayilandela ngemuva ngamaphuzu.
FUNDA NALA: USikhakhane uveza okuweza AmaZulu kwiCarling Knockout
Isanda kuwina i-African Football League (AFL) kanti isayibambile nakwiCaf Champions League. Inethuba elihle lokuwina izindlebe ezintathu kule sizini.
