IDowns ayigcini ngabadlali, isicwiya nezikhulu kwiSuperSport
Kunesikhulu esisebenza enkulisa kwiSuperSport United okuvela ukuthi sesishelwe yiMamelodi Sundowns saze sagcina sivumile.
Ngokwemibiko, lesi sikhulu senza omuhle umsebenzi kwiSuperSport njengoba inkulisa yakhona ingenye yeziphethwe ngokwezinga eliphezulu.
Lokhu yikho okwenza ikwazi ukukhiqiza ukhilimu wabadlali, iningi labo eligcina libe yizihlabani ebholeni lakuleli emaqenjini ehlukene.
Unyaka nonyaka le nkulisa yeSuperSport ikhipha abadlali abasezingeni abafike bangene khaxa eqenjini elikhulu elicijwa uGavin Hunt njengamanje.
Eminyakeni embalwa edlule, iningi lalaba badlali abaphuma kwiSuperSport badayiselwe iMamelodi Sundonws la befike baba yizihlabani khona.
Kubo singabala uRonwen Williams, Tebogo Mokoena, Sipho Mbule noThapelo Maseko.
Manje abeFootball Stage babika ukuthi iSundowns seyifuna isikhulu kwiSuperSport uMuziwakhe Dladla oyimenenja yenkulisa.
Kuthiwa iSundowns imagange ngaye njengoba ifuna azoyisiza, afukule eyabo inkulisa ukuze nayo igcine ikwazile ukukhiqiza abadlali abasezingeni.
FUNDA NALA: UMoon wajikiswa eseyibeke etafuleni eyokuthenga iMaritzburg
UDladla, osesebenze iminyaka engaphezu kuka-16 kwiSuperSport, ubonakala engaba wusizo olukhulu komakhelwane iSundowns.
