UJunior Khanye uthi abalandeli beChiefs bake bafuna ukumthuma uphuthu
INTATHELI YEMPEMPE
Owayeyingawazi yebhola yakudala, ongafunwa abalandeli beKaizer Chiefs ngenxa yezinkulumo zakhe, uJunior Kanye, uthi uke wasongelwa ngokubulawa.
UKhanye uhlale engakhulumi lokhu okufunwa abalandeli baMakhosi ezinkundleni zokuxhumana, okumenza bangamfuni nalapho ehambe khona.
Abanye baze balibeke ngembaba elokuthi akayifuni iChiefs “ngoba wehlulwa utshwala ukuzibonakalisa ngendlela esadlala kuyona.”
Nokho uKhanye uthi yena akananxa naleli qembu laseNaturena, usuke ebeka imibono yakhe nje kuphela.
“Akukona ukuthi kungami, nokuthi angiyithandi iChiefs,” kusho uKhanye ekhuluma noLunga Adam.
“Akukwazi ukuthi ngingesaba ukuhamba esitaladini ngenxa yabantu.
“Noma ubani olwisana nami, kulungile. Lokho ngizokushiyela ezandleni zikaJesu namadlozi ami.
“Ngike ngasongelwa ngokubulawa ngesikhathi ngithe ngeke (abeChiefs) bayinqobe iligi.
“Bathi, ‘sizokubulala,’ ‘sizokuthumba.’ Kodwa angizange ngibaphendule.
“NgiwuJunior Khanye, abantu bayangazi. Ngeke wazi bonke abalandeli bakho ngoba abanye nabo yilabo abakuzondayo.”
UKhanye uyawagxeka namanye amaqembu ezinkulumeni zakhe, kodwa kukhona abanenkolelo yokuthi uhlale efuna ukusho okungekuhle ngeChiefs.
“Mina noma yini engiyishoyo ayikho mayelana nokuthi angithandi abathile, umbono wami,” kuqhuba uKhanye owayedlalela iChiefs.
“Ngiyakholelwa kumbono wami. Akukho mayelana neChiefs kuphela, okuningi esengike ngakusho ngeSundowns nePirates, kwenzekile.
“Nangesizini edlule abantu bebekholwa ukuthi iPirates izowina iligi…kodwa akwenzekanga.”
Njengamanje iPirates isesicongweni kwilogi yeBetway Premiership, futhi abalandeli bayo bakholwa ukuthi izokhala yemuke nesicoco weligi.
Akwaziwa noma uKhanye usakholwa ukuthi leli qembu eselithathe izindebe ezimbili kule sizini – iMTN8 neCarling Knockout – lizophinde lihluleke yini ukuthatha iligi.
