UJayden Adams ubenesifiso sokudlalela iLiverpool FC

SIHLE NGUBO

Obengumdlali wasesiswini weMamelodi Sundowns, uJayden Adams, ubenesifiso sokuyodlala phesheya ngelinye ilanga.

Kushaqeke inqwaba yabalandeli bebhola eNingizimu Afrika, kuvela izindaba zokuthi usedlulile emhlabeni lo mdlali weBafana Bafana.

U-Adams, obeneminyaka engu-25 kuphela, kuvela ukuthi uzikhungile ngoMgqibelo.

Yize isizathu salokhu singakacaci kodwa okwaziwayo ukuthi bekusanda kudlula emhlabeni ugogo wakhe, okuyinto okuthiwa imkhathaze kakhulu.

“Isifiso sami ukuthi ngelinye ilanga ngiyodlala e-Europe,” kusho u-Adams kwenye yamavidiyo aqoshwa esadlala kwiStellenbosch FC.

“Ngifisa ukudlalela iLiverpool FC. Yilona iqembu lami lelo.”

I-Premier Soccer League (PSL), ngomlomo kasihlalo, u-Irvin Khoza, izwakalisa amazwi enduduzo emndenini ka-Adams neSundowns abeyidlalela.

“Ukudlula emhlabeni kungalindelwe kuka-Adams kushiye sonke isizwe simangele,” kusho uKhoza esitatimendeni sePSL.

“Umdlali osemncane obethembisa, ikhono lakhe ukuzehlisa nokuzinikela obekwenza akhonzwe yisizwe sonke.

“Esikhathini esifushane wakhe isithombe esiyohlale sikhunjulwa ebholeni laseNingizimu Afrika.

“Sicela namukele induduzo yethu, niyidlulisele emndenini ka-Adams nawo wonke umndeni

waMasandawana. Umphefumulo wakhe uphumule ngoxolo.”

Ngaphambi komdlalo weNdebe yoMhlaba, phakathi kweNorway ne-England, kube nomzuzu wokuthula kuhlonishwa ukudlula emhlabeni kuka-Adams.

Lo mdlali ubeyingxenye yeBafana Bafana njengoba kade iyibambe kwiNdebe yoMhlaba eqhubekayo e-USA, iseCanada naseMexico.

Le midlalo seyiyavutha njengoba sekuzodlalwa eyandulela owamanqamu.