UMngqithi uhlabe wahlikiza abadlali beGhana ‘abazithwele’

Umqeqeshi weMamelodi Sundowns, uManqoba Mngqithi, ubona abadlali beGhana begcwele ukuzithwala kakhulu ngoba nakhu iningi labo lidlala e-Europe.

UMngqithi, osebenzisana neSABC ukuhlaziya imidlalo ye-Africa Cup of Nations (Afcon), uyihlabe wayihlikiza indlela evala ngayo emuva iGhana.

I-Black Stars iyiqale ngebatha imidlalo ye-Afcon, ebanjelwe e-Ivory Coast, ngesikhathi ithola isibhaxu sika 2-1 kwiCape Verde, ngeSonto.

“Kumele sikuqonde ukuthi ukudlala e-Europe akusho ukuthi ungumdlali ongcono,” kusho uMngqithi ngemuva komdlalo.

“IGhana inabadlali abagijima kumaligi aphezulu e-Europe kodwa bayehluleka ukubhekana nezimo ezifana nalezi (ukuvala emuva).

“Ubona umdlali weGhana ezihambela kancane nje, esikhundleni sokugijima ayosiza emuva.

“Kunabadlali abacabanga ukuthi basezingeni elingcono ngoba badlala e-Europe, ngakho ngeke bazikhandle.

“Yini ungavele uzihlalele ekhaya, bese udedelele ithuba labo abalambele ukudlala.”

IGhana ngelinye lamazwe ahlome ngabadlali abaningi abadlali phesheya.

Kulaba badlali kukhona u-Andre Ayew (ukaputeni) nomnewabo uJordan Ayew.

Nokho sekucacile ukuthi lokho akusebenzi kule Afcon.

Ne-Egypt ibanjwe yiMozambique ngo 2-2, yize inobisi lwabadlali abaholwa ukaputeni uMohamed Salah, odlalela iLiverpool yase-England.