Ace Ncobo: I-Afcon ingigwinyise amazwi ami nge-VAR
Isikhulu sePSL esasingunompempe, u-Ace Ncobo ‘ukujabulele’ ukugwinya amagama akhe ngemibono yakhe ngohlelo lokusiza onompempe i-VAR.
Le nkakha yezokushaywa kwempempe ivumile ukuthi yayilungabaza lolu hlelo lusanda kuqala, ilusola ngokuthi luzohlukanisa ibhola.
“Ngesikhathi i-Fifa yethula okokuqala i-VAR ngaphumela obala ngiphikisana nayo,” kusho u-Ace Ncobo.
“Nganginezizathu ezintathu: Okokuqala, angisoze ngasekela noma yibuphi ubuchwepheshe obungeke busebenze emhlabeni wonke jikelel lapho kudlalwa khona ibhola.
“Ngangibona i-VAR ihlukanisa ibhola ngokuthi kube khona “ibhola labacebile – elinobuchwepheshe, nebhola labampofu elingenabo ubuchwepheshe.
“Okwesibili, ukuma komdlalo ukuze kuyobuyekezwa ividiyo kuzoqeda ukushisa lomdlalo okuyinto eyenza umdlalo uthokozeleke.
“Okwesithathu, asikho isiqinisekiso sokuthi i-VAR izonikeza unompempe into eyiyo ngaso sonke isikhathi.”
Uthe okwenzeka emidlalweni yamaligi la lolu hlelo selusebenza khona kwavumelana nemibono yakhe.
“Ngafakazeleka, ikakhulukazi kulokhu kwesithathu ngesikhathi i-EPL – ethathwa njengeligi ehamba phambili emhlabeni – ikhombisa okubi kakhulu okungadalwa yi-VAR.”
Pho yini le menze awagwinye amazwi akhe u-Ace Ncobo? Uthi yi-Afcon eqhubekayo e-Ivory Coast.
“Kube sekufika i-Afcon! Onompempe bethu base-Afrika kuze kube manje sebefundise umhlaba wonke ukuthi isebenza kanjani le-VAR yakhona.
“Futhi okubaluleke kakhulu, indlela yokuthuthukisa ukushaya khona kwezinqumo zasenkundleni,” kuchaza u-Ace Ncobo.
“Njengonompempe obephikisana kakhulu nale nto, ngijabule kakhulu ngokuthi ama-Afrika ethu angenza ngigwinye amazwi ami.”
Ngale kokuncika kakhulu kwi-VAR, onompempe be-Afcon basabonakale bewenza ngobuchule umsebenzi wabo.
FUNDA NALA: Kekana: Ukudlala nebeDowns emuva kwenza umsebenzi ube lula
I-VAR isasetshenziswe ukuqinisekisa okuthile emidlalweni embalwa kakhulu selokhu iqalile le midlalo.
