IPirates yephule izinhliziyo zabalandeli idedela uLorch

Baveze usizi nokukhathazeka kwabo abalandeli be-Orlando Pirates leli qembu liqinisekisa ukuthi uThembinkosi Lorch usedayiselwe iMamelodi Sundowns.

Izindaba zokuthi uLorch uya kwiSundowns ziqale ekuseni ngoLwesihlanu kodwa kusengamahlebezi nje.

Nalapho abalandeli bePirates bebekhala, besola leli qembu ngokubadayisa kwiSundowns ngokuyinika umdlali walo osezingeni.

“UThembinkosi Lorch uzoshiya i-Orlando Pirates Football Club ngemuva kwezingxoxo phakathi kukaSihlalo uDkt. Irvin Khoza nobuholi beMamelodi Sundowns.

“Iqembu libonga u“Nyoso” ngeqhaza lakhe elikhulu ngokuvula elinye ikhasi emlandweni weqembu,” ibhale kanje iPirates esitatimendeni ngoLorch.

“Sifisela yena nomndeni wakhe okuhle kodwa enjongweni yakhe yezemidlalo yesikhathi esizayo.”

Abalandeli bePirates babe sebephendula ngokuveza ukukhathazeka nobuhlungu babo ngalezi zindaba.

KwabeSundowns, abanye bebegiya, bejabulela lokhu kuhlabana kwezabo ngalesi sihlabani esinofakazi.

Abanye nokho abayizwa kahle eyokusayinwa kukaLorch abambona sengathi usephelelwe wumsoco.

Umlandeli wePirates, uNkosie Madiba ukhale ngokuthi uKhoza sekusele azidayise yena kwiSundown

“UKhoza akavele azidayise kwayena kwiSundowns. Kungani sisiza iSundowns ukuthi iqhubeke nokusilawula?

“Okubi kakhulu wukuthi asisayinanga abadlali abasezingeni likaLOrch, kodwa siyamdayisa yena.”