Akasathandi kwiChippa, kodwa uswele izesheli uStanley Nwabali
SIHLE NGUBO
UStanley Nwabali, ongunozinti waseNigeria, uyaphoqoleka ukuthi ahlale kwiChippa United ngoba alikho iqembu elisakhombise ukuthi liyamfuna.
Lo nozinti udlale kahle kakhulu kwi-Africa Cup of Nations (Afcon) ka-2023, lapho ebemele khona izwe lakhe iNigeria
“Kumele ngibuyele eqenjini lami ngoba akukho okusavelile. Ngifisa ukuthi kube khona okuqhamukayo,” kusho uStanley Nwabali.
“Ngifisa ukuthi isifiso sabantu siphumelele (ukuthi athole iqembu). Ngiyafisa ukuhamba kodwa abekho abasangithintile, ngaphandle kweChippa United ngabe angikho lapha.”
INigeria ishaywe osokhaya i-Ivory Coast ngo 2-1 emdlalweni wamanqamu we-Afcon.
Bekungokokuqala ishaywa emqhudelwaneni, futhi uStanley Nwabali kumshiye edumele.
“Ukukhuluma iqiniso nje, kunzima kakhulu ngoba uyabona amajita awajabulanga,” kuqhuba uStanley Nwabali.
“Bekungaba kuhle ukuthi sishaywe emidlalweni yamaqoqo bese sinqobe kowamanqamu.
“Siyakwemukela, linjalo ibhola kodwa ngifisa ukuthi ngokuzayo kube ngcono.”
Iqembu elithanda ukuntenga ezintini yiKaizer Chiefs, kodwa isanda kuvuselela izinkontileka zonozinti ababili, uBruce Bvuma noBrando Peterson.
Nokho kuzwakala sengathi uNwabali ubheke ukuthola iqembu phesheya, ayifulathele iDStv Premiership.
Yena akazange aphawule ngamampunge okuthi uyasatshiswa kuleli kulandela ukuthi avimba amaphenathi amabili awashisa iBafana Bafana ijezi kulo mqhudelwano.
Impempe ike yabika kuleli sonto ngesikhulu sebhola laseNigeria esithe uNwabali kumele angabe esabuyela kuleli ngoba angazithola esehlaselwa.
Abalandeli bakuleli babezincokolela nozakwabo baseNigeria bethi abasamfuni lapha lonozinti ngoba ‘ulume isandla esimphakelayo’.
FUNDA NALA: UJordaan uqeda konke ukuqagela ngoHugo Broos kwiBafana
Kodwa lesi sikhulu esididizelayo sabe sesikuthatha ngokuthi yizinsongo lokho, saze saphawula ngakho esidlangalaleni.
