Selihlalukile elizodlala nePirates kwiNedbank Cup
Uhlu lwemidlalo ye-Last 32 yeNedbank Cup seluphothuliwe njengoba sekuqinisekisiwe ukuthi yiCrystal Lake FC ezomela izigaba zeSafa eMpumalanga.
ICrystal Lake FC izokwamukela ompetha abavikela isicoco, i-Orlando Pirates, emdlalweni womzuliswano wokuqala eMbombela Stadium ngoMgqibelo. Umdlalo uhlelelwe ukuqala ngo-3 ntambama.
Kuke kwanesikhathi kungacaci ukuthi yiliphi iqembu elizomela iMpumalanga kulo mqhudelwano njengoba bekunombango.
Lo mbango bewuphakathi kwayo iCrystal Lake neMiddleburg United kanti sewugcina uxazululekile njengoba seliphumile neqembu elizodlala nePirates.
Ukube lo mbango ugcine ungaxazululekanga, iPirates beyizogingqa kulo mdlalo bese idlulela phambili ingadlalanga.
Khonamanjalo, iqala ngoLwesibili imidlalo yeNedbank Cup. Kuzoba nemibili ngoLwesibili okudlala kuyo izinkunzi zasePitori.
IMamelodi Sundowns izovula ngeLa Masia eDobsonville Stadium. ISuperSport United yona izobhekana neCape Town City eLucas Moripe Stadium.
FUNDA NALA:Â Johnson: Esikwenza ejimini nokwenzeka enkundleni kwehlukile
Amathikithi ayo yonke imidlalo engu-32 ayathengiswa ezitolo zeTicketPro ezweni lonke. Adayisa kusuka ku-R40 lilinye.
