URulani usolwa ngokuhubhuza amanga ngokuxolelana noBroos
Sekuvele ukuthi umqeqeshi weMamelodi Sundowns, uRulani Mokwena ubehubhuza amanga ngesikhathi ethi usebuyisene nabaqeqeshi ake wagejana nabo ngamazwi.
Lo mqeqeshi weSundowns uke wakhulumeka kabi ngabaqeqeshi ababili – oweTS Galaxy uSead Ramovic noweBafana Bafana uHugo Broos.
Nokho ekhuluma nabezindaba kuleli sonto, uRulani Mokwena uthe wabafonela laba baqeqeshi, bakudlulisa ukungaboni ngaso linye kwabo.
Kodwa uRamovic uthi amanga aluhlaza lawo, kunalokho uthi uMokwena wamthuka ngesikhathi emfonelile.
“URulani akakaze angifonele mina,” ucashunwe esho kanje uSead kwiSABC Sport.
Ngemuva kwalento eyenzeka ngoNovemba 13, ngazwakalisa ukungeneliseki kwami ngokudelela kwakhe abadlali bami nami uqobo.
“Angizange ngilwe naye, ngavikela abadlali bami nje. Ngeke ngivumele muntu adelele abadlali bami ngikhona.
“Kwaphela inyanga, ngahlangana no(Daniel) Mudau kwase kuthi ngakusasa ngathola ucingo sisendleleni ebheke eMbombela.
“Uma ngiluphendula wabe eseqala engishawoda, wakhuluma imizuzu eyishumi yonke.
“Wathi kimi, “Ungubani wena (efaka negama lesiNgisi eliqala ngo‘F’) ukuthi ungafika la ezweni lami ukhulume kanjena nami?
“’Uyazi ukukhi ngobani abazali bami? Qaphela okushoyo ngoba isezweni la’,” kuchaza uRamovic.
“Ngemuva kwalokho ngamtshela ukuthi anginendaba nokuthi obani abazali bakhe, wabe eseluvala ucingo.”
URamovic uphike neyokuthi uRulani Mokwena useke wakhuluma noHugo Broos weBafana kulandela ukuthi athi uzenza ‘uNkulunkulu’ wakuleli.
“Ngikhulumile mina izolo noBroos… Ngimbuzile ukuthi ngingakusho yini (esidlangalaleni) angitshele khona, wavuma.
“Akakaze amfonele uBroos, futhi (uBroos) akazange axolise kuRulani – amanga nje aluhlaza cwe lawo (ashiwo uRulani).”
Ube esephinde egadla naye, ethi uzwela iSundowns ngokuba nomqeqeshi ohambe ehubhuza amanga.
“ISundowns kumele isebenzisane nomqeqeshi ohambe ehlanganisa amanga.
FUNDA NALA: UHugo Broos uxakwa yipapa nokushayela kuphela kuleli
“Uma ungangikholwa, uungambuza uBroos ngoba ngikhulumile mina naye.”
