Sekusele kubaphathi boSuthu ngoMakhubela, uMartin uyamfuna
UNtsako Makhubela useqalile ukujima naMaZulu FC ngesikhathi esalinde ukuba abaphathi beqembu nemenenja yakhe baqede izingxoxo.
Lo mdlali ungomunye wabangu-23 abakhonjwe indlela kwiMoroka Swallows ngoJanuwari kulandela isiteleka sabo sangoDisemba.
Ngemuva kokuphelelwa wumsebenzi kwiSwallows, uNtsako Makhubela uke waziqeqesha noSuthu isikhashana, kodwa wabuye wayeka.
Nokho ubuyelile ejimini yaleli qembu laseThekwini ngoLwesithathu, kanti umqeqeshi uPablo Martin uveze ukuthi yena usesithathile esakhe isinqumo ngaye.
“Kunjalo, sisithathile isinqumo kodwa thina njengabaqeqeshi kunezinqumo esingeke sizithathe.
“Ezinye izinqumo kumele zenziwe ngabanye abantu,” kusho uMartin ngemuva komdlalo wezakhe neRoyal AM kwiNedbank Cup ngoLwesine.
Usuthu yilo oludlulele phambili ngemuva kokunqoba ngo 1-0 wegoli likaPule Ekstein kulo mdlalo.
“Yibona okumele baxoxisane bese bethatha isinqumo sokugcina bese sibona kwenzakalani.
“Akukho enginganitshela khona njengamanje, kodwa vele seniyazi ukuthi uyajima nathi.
“Sisaqhubeka nokubheka ukuthi yini ekhona emakethe ngoba sinaso isidingo sokuqinisa iqembu.”
UNtsako Makhubela uqale ukuzakhela igama kwiGolden Arrows wabe eseheha amehlo ezinhloli ze-Orlando Pirates.
Leli qembu laseSoweto labe selimthenga futhi wafika kulo kubhekwe lukhulu njengoba ebedlisa ngomjiko, okuyinto abalandeli beBucs abayithandayo.
Nokho ugcine ehluleka ukungena eqenjini eliqala umdlalo. Ngesizini edlule ubebolekiswe kuyo iGolden Arrows.
Ekupheleni kwesizini ubuyele kwiPirates wafike wathola ukuthi inkontileka yakhe ngeke ivuselelwe.
FUNDA NALA: ISundowns isimbuyisele ekhaya uSaveedra
Ube esethathwa yiSwallows, kodwa akuphelanga nezinyanga eziyisithupha yabe seyimkhulula ngoba etholwe enecala lokungaziphathi kahle kulandela isiteleka.
