Izobuka ngewindi iChiefs kuqhathwa aweNedbank Cup

SIHLE NGUBO

Amaqembu azotholana phezulu kwiNedbank Cup Last 16, azoqhathwa ngoMsombuluko ngo-6 ntambama, eGoli.

Izobe ingabonwa nakulokhu iKaizer Chiefs ekhishwe yiMilford FC kwiLast 32 yeNedbank Cup, emdlalweni ophele ngo 5-4 sekukhahlelwa amaphenathi.

Umdlalo uphele ngo 0-0 emizuzwini engu-120, yize iChiefs ithole inqwaba yamathuba okushaya amagoli.

Nakulokhu kugqame ukungazethembi phambi kwamapali kubadlali baMakhosi, kanti nonozinti weMilford FC uSiphamandla Hleza, uvimbe kahle kakhulu.

UHleza uvimbe ngisho iphenathi kaRanga Chivaviro esiwombeni sokuqala sesikhathi esengeziwe.

Amanye amaqembu eDStv Premiership awashiswe ijezi kwiNedbank Cup yiLamontville Golden Arrows, eshaywe yiTS Galaxy ngo 2-1, neRoyal AM, eshaywe AmaZulu FC ngo 2-1.

IPolokwane City ishaywe yiRichards Bay ngo 3-2 kwathi iCape Town Spurs yadliwa yi-University of Pretoria ngo 1-0.

I-Urban Warriors mhlawumbe kuyisizile ukuphuma kwiNedbank Cup njengoba izinto zingayihambeli kahle kwiDStv Premiership.

ISpurs iyona eyivale ekugcineni kwilogi yeDStv Premiership, futhi maningi amathuba okuthi ibuyele kwiMotsepe Foundation Championship ngesizini ezayo.

Esewonke amaqembu azoqhathwa kwiNedbank Cup Last 16 ngoMsombuluko yilawa:

YiMamelodi Sundowns, yi-Orlando Pirates, iSuperSport United, iSekhukhune United, iChippa United, AmaZulu FC, iStellenbosch FC.

FUNDA NALA: UKadodia uveza okwenza ahoxe ekuthengeni iSwallows

I-TS Galaxy, iMoroka Swallows, iRichards Bay, i-University of Pretoria, iHungry Lions, iMaritzburg United, iMilford FC, iD’General neFC Ravens.