IChiefs isishwebe omunye umdlali eke yazama ukumthenga
SIHLE NGUBO
Iphinde yashweba ukuthola umdlali iKaizer Chiefs kanti kulokhu ihlwithwe iqatha emlonyeni yiStellenbosch FC.
Kuke kwavela phambilini ukuthi iChiefs ibicathamela uSanele Barns, ongumgadli weRichards Bay FC.
Nokho kube nokungavumelani ngokwemali ebibekwa Amakhosi etafuleni, ngokusho komthombo weMpempe ongaphakathi kwiNatal Rich Boyz.
“Engikwaziyo ukuthi iChiefs ibifuna uBarns kodwa bangavumelana neRichards Bay ngo-R2 million ebifuna ukuwukhipha ngalo mfana,” kusho umthombo.
“Ngemuva kwalokho kube sekuvela ukuthi kukhona iqembu laseKapa elizimisele ngokumsayinisa.”
Ezakamuva zithi uSanele Barns uzobe egijima kwiStellies ngesizini ezayo ngemuva kokuvumelana kwayo neBay ngalo mdlali.
Kuthiwa usayine inkontileka yeminyaka emithathu nezikaSteve Barker kodwa uzoze azijoyine ekuqaleni kwesizini ezayo.
INatal Rich Boyz izama ukubalekela izembe njengoba iyibambe endaweni ka-15 kwilogi yeDStv Premiership.
Kukholakala ukuthi yikho lokhu okwenza ingakwazi ukudedela uSanele Barns manje, kuze kube iyaphepha ezembeni ekupheleni kwesizini.
IChiefs sekuyijwayele ukuthi kuvele izindaba zokuthi ifuna umdlali kodwa agcine ephelele kwelinye iqembu.
FUNDA NALA: Usewutholile umsebenzi umdlali obesesola umsamo ngamashwa
Abalandeli bamanye amaqembu baze bathi leli qembu laseNaturena libasayinisa kwiFacebook abadlali, dololo ukufinyelela kulona.
