URamovic uthi onompempe bePSL kusamele babuyele esikoleni
ICape Town Spurs iqhubekile nokukhombisa ukuvuka kwiDStv Premiership ishaya iTS Galaxy ngo 2-0 ngeSonto ntambama.
Amagoli eSpurs ashaye ngoRicardo Cupido noKatlego Maphathe esiwombeni sokuqala.
Esiwombeni sesibili iGalaxy ibuye seyidlala kangcono futhi kuyiyo eyakha amathuba kodwa kwagqama izinqumo zonompempe ezingacaci.
Unompempe uThabo Mkhabela ubekele iGalaxy iSpurs, kodwa kuthe uHigor Vidal eselungela ukuyikhahlela wabizwa iphini lakhe.
Kuyacaca ke ukuthi leli phini lifike lamtshela ukuthi benze iphutha ngoba ubuye esejika isinqumo wathi akusiyo iphenathi.
Ube esehlawulisa uSamir Nurkovic ngokumnika ikhadi eliphuzi ngokuzama ukumthenga ngokuziwisa.
Uphume esegadiwe ke lo nompempe abadlali beGalaxy – ikakhulukazi uNurkovic – befuna ukuzifikela kuye ukuze abachazele kahle ngale phenathi.
Lo nompempe ukhombise isibindi nokuzethemba njengoba ebelokhu enqekuzisa ikhanda ekhombisa ukuthi uyabezwa laba badlali.
USead Ramovic uthe kuyafana nokuzimoshela isikhathi ukhala ngonompempe ngoba uyaqonda ukuthi abawazi umsebenzi wabo.
“Angiyiqondi indlela onompempe abebedlalisa ngayo lapha,” kusho lo mqeqeshi ozikhulumelayo.
“Bathi kudlaliswe kabi umdlali, babuye bajike. Bathi iphenathi, babuye bathi akusiyona.
“Siyacela, kumele kube khona ozosichazela kubaqeqeshi ukuthi imithetho isithini manje.
“Mina angisaqondi nhlobo. Malabo nompempe (obedlalisa lo mdlalo) emdlalweni wokugcina weStellenbosch neSuperSport (United) bekunamaphutha amaningi.
“Ubezijikajika izinqumo zakhe… Ugcine ungazi kwenzekani. Kodwa ngicabanga ukuthi akumele sizimoshele isikhathi ngabo.
“Siyazi ukuthi badinga usizo, badinga ukufundiswa kahle ngoba babulala imidlalo eminingi,” kuchaza uRamovic.
Uvumile ke nokho ukuthi neqembu lakhe livele alizibekanga esimweni ebesingalivuna ukuthi linqobe lomdlalo.
“Ngiabanga ukuthi asiqalanga kahle. Besilwa nebhola silikhahlela sijahe ukuya phambili,” kusho uRamovic.
“Sizenzele ubunzima. Silinyazwe amaphutah ethu, egolini lokuqala asizange sibuyele emuva kuyovala.
“Lokhu kubenze baba nesikhathi ebhokisini – bashaya igoli. Kube esifanayo nakwelesibili, uma kunjalo ngeke kube lula ukunqoba imidlalo.”
Uthe ukube bebedlale ngendlela abebedlala ngayo emidlalweni yabo emihlanu edlule, ngabe kukhulunywa okunye.
“Uma singadlali ngale ndlela esidlale ngayo emidlalweni emihlanu edlule, kuzoba nzima ukunqoba.
“Ngihlale ngisho ukuthi yonke imidlalo kule ligi inzima, futhi kumele ngincome nezimbangi zethu ngokusinika umdlalo omuhle futhi onzima.
“Kumele sifunde kulo mdlalo bese siqonda ukuthi uma sifuna ukunqoba umdlalo imiqondo yethu kumele ihlale ibukhali.
“Kodwa ekugcineni ke wuhambo oluqhubekayo lolu, sizofunda kulokhu, sizobuyela emuva sibheke ukuthi senze njani bese sikhuluma ngakho.
FUNDA NALA: Zithini ngoKhune kwiChiefs? Imenenja iyacacisa
“Ngisenethemba ngokuthi iqembu lami liyakhula ikakhulukazi uma ubheka indlela esizame ngayo esiwombeni sesibili ukubuya emdlalweni.”
