Kwethulwe umqhudelwano ozosiza awe-ABC Motsepe League eKZN

ISafa KwaZulu-Natal, eholwa nguKwenzakwakhe Ngwenya, yethule abaxhasi abasha esithangamini sabezindaba eRoyal Hotel eThekwini kuleli sonto.

Laba baxhasi yinkampani yezobunjiniyela iZLM Projects, kanti izoqhubeka nomqhudelwano wendebe yesigaba se-ABC Motsepe League esifundazweni.

Le nkampani iholwa nguDkt Thabani Gumede kanti le ndebe yona isizokwaziwa ngeZLM Projects Cup.

Ukuthola abaxhasi kumjabulise kakhulu uNgwenya kanti uphinde wahlaba ikhwelo nakwezinye izinkampani ukuthi zingene ebholeni.

Enaba kabanzi ngale ndebe, uNgwenya uthe kuba negebe elide phakathi kokuphela kwemidlalo ye-ABC Motsepe League nokuqala kwemidlalo yokuhlunga.

Lokhu kwenza iqembu elisuke lizomela iKZN kweyokuhlunga libe nesikhathi eside lingadlali, okulenzela phansi kweyokuhlunga.

“Ngicabanga ukuthi kuzoba nomehluko omkhulu njengoba iqembu elizodlala emidlalweni yokuhlunga kazwelonke lizofika lifithi.

“Lokhu kungenxa yokuthi lizobe kade lidlala emqoka kakhulu (yale ndebe),” kucacisa uMntimande.

IZLM Projects ixhase lo mqhudelwano ngesamba sika-R200 000.

Iqembu elizodla umhlanganiso lizohamba nesizumbulu siika-R100 000.

Eliyolala isibili lona lizohlomula u-R50 000, kanti eliyoba sendaweni yesithathu liyothola u-R20 000 elesine kube u-R10 000.

Umdlali ozoshaya amagoli amaningi yena uyothola u-R2 000, unozinti nomqeqeshi abazovelela nabo bayohamba no-R2 000 ngamunye.

Umdlali omncane ovelele uzohamba nemali uyothola u-R1 000.

Kuzokhuthazwa nabalandeli njengoba kukhona u-R1 000 oyitholwa umlandeli ovelele.

Imidlalo yalo mqhudelwano izoqala ngempelasonto ezayo ezinkundleni ezehlukene eThekwini.