UKatsande ushaya amakhala ngokuzinikela kwabeChiefs
Owayengumdlali weKaizer Chiefs, uWillard Katsande useveze izinsolo zokuthi abadlali abakuleli qembu njengamanje abazinikele emsebenzini wabo.
UKatsande wayeyinjini yeChiefs isikhathi eside futhi owanqoba izindebe ngaphansi kukaStuart Baxter ngesizini ka-2014/15.
Banqoba isicoco seDStv Premiership (isabizwa nge-Absa Premiership) neMTN8 ngaleyo sizini futhi selokhu kwagcina lapho ukuthi iChiefs inqobe indebe.
USalt and Vinegar, okuyigama abedume ngalo kubalandeli uWillard Katsande, uthi ibheji yeqembu ngathi ayisho lutho kule genge edlala manje.
“Ngikhathazekile ngabadlali bamanje futhi ngibaphonsela inselelo ukuthi bazinuke amakhwapha,” kusho lo mdlali odabuka eZimbabwe kwiRadio 2000 ngoLwesibili.
“Uma beqalaza, eNaturena namanje kusekhona izithombe zethu sigcina ukunqoba, abathuki yini ngalokho?
“Abazibuzi yini ukuthi kungani iqembu lisenezithombe zikaShabba (Siphiwe Tshabalala), Yeye (Reneilwe Letsholonyane) noKatsande odongeni?
“Abazibuzi ukuthi kungani bona bengakwazi ukuthi benze kulengiswe nezabo izithombe?
“Ngibona sengathi iqembu alikho ezinhliziyweni zabo futhi abakuzwa ukubaluleka kwabalandeli beKaizer Chiefs abangu-16 million.
“Engangijwayele ukukwenza ngisadlala kwiKaizer Chiefs, ngaya eSoweto ngafic aikhehla elathi kimi, ‘ngicela usilwele ngaso sonke isikhathi’.
“Uma ufika ejimini uzosebenza kanzima uthi angifuni ukuphoxa leliya khehla noma lesiya salukazi.
“Ngakho kumele bangene emphakathini laba badlali beChiefs ukuze babone ukuthi kusho ukuthini ukumela iChiefs.
“Uma beya e-FNB Stadium, babone izinkulungwane zabantu zizobuka ibhola, bayakhohlwa wukuthi kunezigidi ezibukela emakhaya ezifuna iqembu lenze kahle.
“Uma bengase bakubeke ekhanda bathi ‘uma ngigijima u-5km, ngingaliphinda kabili lelo banga libe ngu-10km ukuze ngikwazi ukunikela ngakho konke eqenjini’.
FUNDA NALA: Kwethulwe umqhudelwano ozosiza awe-ABC Motsepe League eKZN
“Bengingeyena ungqa phambili womdlali, kodwa akekho umlandeli weKaizer Chiefs obekungabaza ukuzinikela kwami.”
