Usihlalo weRichards Bay ungene emabhukwini amabi kwiPSL
Uqophe umlando usihlalo weRichards Bay FC, uSifiso “Jomo” Biyela eba ngumphathi wokuqala weqembu ukuhlawuliswa yiPSL ngokungaziphathi kahle.
IPSL ihlawulise uBiyela qede wameluleka nangokuthi njengoba engumphathi weqembu nje kunendlela ethile okulindeleke aziphathe ngayo.
UBiyela kubikwa ukuthi ube nokuhilizisana nesikhulu seRoyal AM emdlalweni wangempelasonto, kwaze kwagcina ngokuthi akhiphe amazwi alumelayo.
“Siqule icala lokungaziphathi kahle elibhekiswe kusihlalo weRichards Bay ngokukhuluma amazwi ahlabayo ebhekiswe esikhulwini seRoyal AM uRichard Makhoba.
“Ulivumile icala,” kusho umshushisi wePSL uZola Majavu ngemuva kwesiqephu sakamuva sesigungu esiqondisa ubugwegwe.
“Ngemuva kokulalela izethulo isigungu sePSL sinqome ukuthi kumele ahlawuliswe imali engu-R150 000.
“U-R50 000 waleyo mali uzolengiswa ngombandela wokuthi angatholakali enecala elifanayo ezinyangeni ezingu-24 ezizayo.
“IPSL ikugcizelele (kuBiyela) ukuthi ungumholi weqembu ngalokho kulindeleke aziphathe ngendlela eyisibonelo.
“Kodwa njengoba exolisile kuMakhoba, naye wakwamukela lokho, isigungu sePSL sibone ukuthi ukuthi isigwebo esikhiphile sifanele.”
Neqembu lakhe, iRichards Bay lithole eyalo inhlawulo eqinile kulandela ukuthi abalandeli bengaziphathanga kahle kulo mdlalo wangoMashi 2.
“Neqembu iRichards Bay libekwe icala lokungaziphathi kahle ngokuthi abalandeli bajikijele okuthile enkundleni.
“Ihlawuliswe isamba sika-R200 000, kwathi u-R100 000 walengiswa ngombandela wokuthi ingatholakali necala elifanayo…”
FUNDA NALA: Awumcimbi omncane kwiDowns eqhathwe nawo kwiChamps League
UMajavu uthe ngeke aphawule ngaleli cala ngoba selivaliwe ngokwabo njengoba seliquliwe kwaphuma nezigwebo.
