Abalandeli bafake iChiefs odakeni, bahlela ukuyiduba
Izophinde iyoquliswa icala lokungaziphathi kahle kwabalandeli iKaizer Chiefs ngoLwesihlanu kanti kjzobe sekungokwesithathu kule sizini ibhekene necala elifanayo.
Umshushisi wePSL, uZola Majavu uqinisekisile ukuthi kuneqembu elizovela phambi kwesigungu esiqondisa ubugwewe kwiPSL ngoLwesihlanu.
Yize engalivezanga igama leqembu, kepha kusobala ukuthi yiChiefs njengoba abalandeli bayo bephinde bajukujela izinto enkundleni ngoMgqibelo.
Lokhu bekulandela ukuthi leli qembu lihlulwe yizimbangi zalo ezindala i-Orlando Pirates ngo 3-2 emdlalweni weligi eFNB Stadium.
Abadlali nabaqeqeshi baphume enkundleni sebevikelwe amaphoyisa njengoba idlanzana labalandeli belibajikijela libathuka.
“Ngingakuqinisekisa ukuthi kukhona okuzokwenzeka ngoLwesihlanu la elinye iqembu lizobhekana necala lokungaziphathi kahle,” usho kanje uMajavu ngoLwesibili.
“Lokhu kusukela ekungaziphathini kahle kwabalandeli. Uma lolo daba seluphothuliwe, cishe ngoLwesihlanu, ngiyobe sengazisa umphakathi ngokugcwele.”
Uma ithola inecala iChiefs, izozithola ihlawuliswa imali enkulu njengoba ivele ilengiselwe isigwebo ngecala elifanayo nje.
Njengoba kuyibo abalandeli abayifake kulolu taku, Impempe seyihoshe umoya wokuthi bahlela ukuliduba leli qembu ngesizini ezyao.
Umthombo usihlebele ukuthi seziqalile izinkulumo kubalandeli abahambela imidlalo ezinkundleni ukuthi kumele bakuyeke lokho kuze kube bayalalelwa.
“Sihlela ukuduba yonke imidlalo nokuthenga izimpahla zeqembu ngoba abaphathi beKaizer Chiefs badudwa yithina balandeli.
“Sibaduda ngokuqhubeka nokuthenga izimpahla nokuhambela imidlalo,” kusho lo mlandeli onngomunye wabathathwa njengabaphambili eqenjini.
Usidonse ngendlebe ke ukuthi singalinge siliveze igama lakhe ngoba lokho komdalela amazinyo abushelelezi.
“Kuzomele abaphathi bakuqonde ukuthi ukufaka kwetu imali eqenjini ngokuthenga izimpahla namathikithi senziwa wuthando.
“Manje njengoba bengaqhamuki nesixazululo kule minyaka eyisishiyagalolunye kusho ukuthi basalele ngengubo yezinkinga.
“Kumele sibembule le ngubo yabo kabuhlungu. Sizoqala umkhankaso kubalandeli emagatsheni ezweni lonke…
FUNDA NALA: ‘Uvume’ uHunt uMokwena iDowns ibanjwa yiSuperSport
“Uyabona singobasi beKaizer Chiefs kodwa abaphathi abasihloniphi nhlobo, basithatha kancane. Kumele silibuke kumabonakude ibhola khona bezovuka emaqandeni.”
