Iyithuba lokugcina kubasubathi iPrince Mangosuthu

IPrince Mangosuthu Marathon izoba ngumjaho wokugcina wokuhlungela iComrades Marathon.

Lo mjaho, oqale ukugijinywa ngo-2019, wethulwe kuleli sonto eLangeni Hotel eThekwini kanti ukhomba ukukhula okuhle. 

Imeya yoMzinyathi Municipality, uPS Ngubane utshele Impempe ukuthi lo mjaho bawuqale nemeya yaseMsinga uDkt FJ Sikhakhane ngenhloso yokuhlonipha iNkosi Mangosuthu Buthelezi. 

FUNDA NALA: Iqale kahle iTrouble Makers koweDurban Afcon

UNgubane uyimeya yokuqala ekade isondelene kakhulu noMntwana wakwaPhindangene neSilo esesakhothama uMdlokombane njengoba naye ezalwa ebukhosini baMabomvu eMsinga.

Inkosi uZuzifa Buthelezi, oyinkosana kaMntwana waKwaPhindangene, uveze ukuthi Inkosi uMangosuthu Buthelezi wayeyiqaphela kakhulu into ethinta igama lakhe.

“Wayengavumi nhlobo ukuthi iqanjwe ngaye uma ngabe ingazowenza umehluko ezimpilweni zabantu.

“Kodwa ngesikhathi efika kuyena uMbomvu wavumela phezulu ukuthi lo mjaho uqanjwe ngaye,” kusho Inkosi uZizifa.

Lona ngumjaho wokuqala KwaZulu-Natal okhokha imali enkulunjengoba ophuma phambili kwabesifazane nabesilisa  ebangeni lika-52km ethola u-R100 000.

Abaphuma isibili bagoduka noR50 000. Ebangeni lika-21km umphetha wakhona uthola u-R50 000 kanti kwelika-10km kukhokhwa u-R5 000. 

Lo mjaho uzoba ngoMeyi 5 ngokusho komqondisi wePrince Mangosuthu Marathon, uCeli Makhoba. 

Uzosuka eDundee eduze nebhilidi iPrincess Magogo ekuseni ngo5:30, uphelele eNquthu Stadium.