Kuwaphindile lokho AmaZulu eqhathwa nePirates
AmaZulu FC aphinde athola iqembu eseliwashwebise kwaze kwakaningana ezindebeni kule minyaka embalwa i-Orlando Pirates kwiNedbank Cup.
Kule minyaka embalwa edlule Usuthu kunenhlanhla yokuqhathwa nalezi zinkunzi zaseSoweto kanti zifike zizidlulele kalula.
Indlela yoSuthu iphinde yaqansa kulo mqhudelwano luqhathwa nePirates engompetha abavikela le ndebe.
IPirates iwawashise kabili AmaZulu ijezi kwiMTN8. Yayiphoxa seyithembile ngesizini edlule esefike kowamanqamu.
Aphinde athola yona ngesikhathi kuqhathwa amaqembu azodlala emzuliswaneni olandelayo wale ndebe ngoMsombuluko.
Iqembu lesigaba eliphansi elisele lodwa, i-University of Pretoria, libonakala selifike kwangqingetshe njengoba liqhathwe neMamelodi Sundowns.
Phela iSundowns ishaya kwasani ephambi kwayo kulezi zinsuku kanti kungaba yiphanta elibheke ukuwina izizumbulu elingabhejela ukuthi igiqe iSundowns kulo mdlalo.
Kweminye imidlalo, iStellenbosch, esibhaxabule iMilford ngo 6-1 ngempelasonto, izobhekana neSuperSport United.
FUNDA NALA: UPetersen waxolisa ‘ngokuthethisa’ umqeqeshi weChiefs
ITS Galaxy yona izokhiphana inkani neChippa United. Izinkundla nezinsuku zale midlalo kuzoqinisekiswa yiPSL ngokuhamba kwezinsuku.
