OweTshakhuma uchaza ngesinqumo sokudlala nePirates eThekwini koweNedbank Cup
SIHLE NGUBO
Imenenja yeTshakhuma Tsha Madzivhandila, u-Azwihangwisi Phasha, ichaza ukuthi kungani beyise umdlalo wabo weNedbank Cup Last 32 ne-Orlando Pirates, eMoses Mabhida Stadium, eThekwini.
Leli qembu elidlala kwiSafa ABC Motsepe League, eLimpopo, kumangaze abaningi kuvela ukuthi umdlalo walo neZimnyama uzodlalelwa kwelikaBhanana, KwaZulu-Natal, ngoMgqibelo, ngo-3 ntambama.
Ukusuka eThohoyandou, lapho leli qembu lizinze khona, uya eThekwini, kungamakhilomitha angu-1059, kanti kukuthatha amahora angu-11 nemizuzu engu-20, uma ushayela.
Nokho uPhasha uveze ukuthi isimo besibaphoqa ukuthi bayodlalela umdlalo wabo wasekhaya like nkundla, eyakhiwa ngesikhathi seNdebe yoMhlaba ka-2010, eNingizimu Afrika.
“Indawo yethu, eThohoyandou, ingaphansi kwesimo esibucayi ngenxa yezikhukhula,” kusho uPhasha kwiRadio 2000.
“Enye inkundla ebesingaya kuyona yiPeter Mokaba kodwa ngeke sikwazi ukuyithola ngoba iKaizer Chiefs inomdlalo weCAF ngeSonto.
“I-Old Peter Mokaba Stadium incane kakhulu, yingakho sikhethe ukuya eThekwini.”
Lesi sinqumo sibukeka sizovuna kakhulu iPirates ebivele iseThekwini kusukela kuqala isonto.
IBucs ishaye AmaZulu FC ngo 2-0 emdlalweni weBetway Premiership, eMoses Mabhida Stadium, ngoLwesibili.
Lokhu kunqoba kwenze leli qembu laseSoweto lanyukela esicongweni selogi yeBetway Premiership.
“Siyazi ukuthi ibhola selibuyile manje eThohoyandou kodwa besingeke sisakwazi ukushintsha sibuyele khona,” kuqhuba uPhasha.
“Siyakuqonda ukuthi abalandeli bethu abeneme kodwa noma yikuphi kusekhaya kithina.
“Yingakho sibanike amathikithi okuya nokubuya eThekwini abiza u-R100 kuphela.
“Siyaxolisa kakhulu ngokwenzekile. Kodwa sinamabhasi amahlanu azobathwala.
“Mayelana nokuthi sizotholani thina ngokudlala eThekwini, ngeke ngikwazi ukukuveza lokho lapha.
“Kodwa nakanjani njengeqembu lasekhaya sizothola ingxenye yemali yokudayiswa kwamathikithi eMoses Mabhida ngalo mdlalo wethu nePirates.”
Igcina ukudlala kule nkundla iBucs, ngaphansi kwalo mqhudelwano, ishaywe yiChiefs ngo 2-1 kowamanqamu.
