Umqeqeshi uwafuna la amagoli kimi – Lorch
SIHLE NGUBO
UThembinkosi Lorch weMamelodi Sundowns, uthi umqeqeshi uRulani Mokwena ubelokhu emhlali entanyeni ngokuthi ashaye amagoli.
Usho lokhu ngemuva kokuthi beshaye iMaritzburg United ngo 2-0 emdlalweni weLast 16 yeNedbank Cup, eLucas Moripe Stadium, ngeSonto ebusuku.
“Umqeqeshi ubelokhu eyiphela endlebeni kimina ngokuthi angiwashayi amagoli,” kusho uThembinkosi Lorch, obe umdlali ovelele kulo mdlalo.
“Ngiyajabula ukuthi namuhla ngikwazile ukushaya amagoli amabili.
“Ngiyabonga kubalandeli ngokungamukela kahle eqenjini. Ngibonge nomqeqeshi ngokubekezelela nokungiphusha.
“Bekungelula kimina njengoba ngifike ngivela kwi-Orlando Pirates.”
Umdlalo uke wama isikhathi esingangehora ngenxa yezulu ebeliduma kakhulu ePitoli.
Ngaleso sikhathi womabili amaqembu abengakahlangani kahle kucaca ukuthi abesafundana.
Nangesikhathi esebuyela enkundleni kuthathe isikhathi ukuthi afudumale amaqembu kodwa iSundowns ibibukeka ingcono.
ITeam of Choice ibambelele ivala emuva kwaze kwaba Abafana Ba’Style bathola igoli ngomzuzu ka-74.
Lize noThembinkosi Lorch obeseke wawathola amathuba wangawasebenzisa.
Ubuyile futhi uLorch ngomzuzu ka-90+5 washaya igoli eliqinisekise ukuthi iSundowns idlulelq kuma-quarterfinal eNedbank Cup ka-2024.
Egcina ukubhekana kulo mqhudelwano la maqembu, iMaritzburg yawina ngo 3 -1 ngo-2018.
Emidlalweni emine yeNedbank Cup, kubhekene la maqembu, iSundowns seyiwine emithathu kanti iMaritzburg isawine owodwa.
FUNDA NALA: Kuzoqina ezemidlalo kwakhiwa isizinda sokuziqeqesha eHarry Gwala
Emdlalweni weDStv Premiership wokugcina ngesizini edlule la maqembu abambane ngo 1-1, ngaphambi kokuthi iTeam of Choice yehlele kwiMotsepe Foundation Championship.
Ukuqhathwa kwamaqembu azidlala emzuliswaneni olandelayo kwiNedbank Cup kuzokwenziwa ngoMsombuluko ebusuku.
