Izihlazile iBafana ibanjwa ompushana base-Europe

Emdlalweni wakhe wokuqala ebholeni lamazwe ngamazwe, u-Elias Mokwana uzethule kahle kwiBafana Bafana ngokushaya igoli lakhe lokuqala. 

Nokho cishe yilokho kuphela okuhle okungashiwo ngeBafana njengoba iphoxile ihluleka ukushaya ompushana base-Europe, i-Andorra.

Lo mdlalo weFifa Friendly Series bewuse-19 May 1956 Stadium e-Annaba e-Algeria ngoLwesine ebusuku (uphele ngoLwesihlanu ekuseni kuleli). 

Umqeqeshi weBafana, uHugo Broos, uqale umdlalo ngabadlali abane abebeqala ukudlala kuleli qembu lakhe. 

Labo ngoMokwana, Thapelo Xoki, Mlondi Mbanjwa, noPatrick Maswanganyi. 

UMbanjwa uthole ithuba lokuzethula ngendlela emangalisayo kuleli qembu umdlalo usanda kuqala, kodwa lo mfanyana osemncane waMaZulu FC wehluleka ukulisebenzisa. 

Kuthe kusenjalo, unozinti Ricardo Goss wavele wapha umgadli we-Andorra uRicardo Fernandez igoli elilula.

Lo nozinti uhluleke wukubamba ibhola abeliphaselwe uNkosinathi Sibisi, laphuma emanta labe selihlala phambi kukaFernandez.

Nokho iBafana iphinde yabuya ngokushesha, uMokwana washaya elokulinganisa kusaphele imizuzu engu-20 i-Andorra ihambe phambili. 

Izamile ke ngemuva kwalokho iBafana ukuthola elokuwina kodwa kwaba wukuthi imoyizelelwa yisambane. 

FUNDA NALA: UBroos ufuna iBafana yenze i-Andorra isitebhisi 

Edlalweni olandelayo iBafana izobheka ukwenza kangcono seyibhekene nosokhaya i-Algeria eNelson Mandela Stadium, e-Algiers ngoLwesibili.