Uvume iphutha lendlela ashiya ngayo iChiefs uDithejane

Usenakho ukuzisola umdlali osemncane ochithwe yiKaizer Chiefs ngemuva kokwenqaba ukuba ‘umfana olanda ibhola’ emdlalweni weDStv Premiership.

UPutso Dithejana (19) ungomunye wabadlali ababili abamiswa yiChiefs kade bedlala kwiDStv Diski Challenge ngoNovemba nyakenye.

Ngemuva kokumiswa kwakhe, uDithejane wabe esenquma ukuduba kwagcina ngokuthi axoshwe. 

Waba nenhlanhla ke njengoba iTS Galaxy yagxuma yamsayina kanti usengomunye wabadlali abaqala imidlalo.

Kodwa usephumele obala waveza ukuzisola ngendlela ashiya ngalo kuleli qembu laseNaturena.

“Ukukhuluma iqiniso le nto engayenza yayingeyinhle ngoba angimkhulu ukwedlula iqembu,” kusho uPutso Dithejana kwiFARPost.

“Ngiyakuhlonipha lokho futhi ngiyalihlonipha neqembu. Kimina ukwenza lokho eqenjini kwaba ukungahloniphi.

“Kodwa ngangingaqondile ukukwenza. Ngiyayihlonipha iChiefs futhi angikho mkhulu ukwedlula iChiefs.”

Kwaba nokwehlukana kwemibono kubalandeli ngesenzo salaba bafana sokwenqaba ukugada ibhola.

Kukhona ababecabanga ukuthi kudlalwa ngabo ngoba umsebenzi wabo ukudlala ibhola hhayi ukuthi baligade uma kudlala iqembu elikhulu.

Abanye babethi bakhombise ukungahloniphi ngoba bebengeke banconzuke ndawo ngokuyogada ibhola kudlala obhuti babo abadala.

“Engikufundile ukuthi akufanele wesabe ukwenza amaphutha. Sonke ebholeni siyawenza amaphutha,” kuqhuba uPutso Dithejana.

“Umuntu kumele afunde emaphutheni akhe bese enze kangcono ukuya phambili.

FUNDA NALA: Angase avumbuke kwelinye lePremiership oxoshwe yiStellies

“Angicabangi ukuthi ngiyazisola ngokushiya iKaizer Chiefs ngoba leli yithuba lami lokudlala kwiPSL. Ngifunda lukhulu kulokhu.”