IDowns izobhekana nomqansa kwiFifa Club World Cup
SIHLE NGUBO
Linzima iqoqo okufakwe kulona iMamelodi Sundowns kwiFifa Club World kulandela ukuqhathwa ngokusemthethweni kwamaqembu azoyibamba kulo mqhudelwano ngonyaka ozayo ngoLwesine ebusuku.
Abafana Ba’Style yilona lodwa iqembu laseNingizimu Afrika elizoyibamba kulo mqhudelwano kulandela ukwenza kahle kwiCaf Champions League kule minyaka edlule.
ISundowns, esibe ompetha bePremiership iminyaka eyisikhombisa kulandelana, igcine ukunqoba iChampions League ngo-2016 kodwa ihlale ikhona kulo mqhudelwano futhi yenza kahle.
Ngo-2022/2023 nango-2023/2024 iSundowns iphume kweyandulela owamanqamu weChampions League kusekhona uRulani Mokwena.
ISundowns izobhekana neFluminese yaseBrazil, iBorussia Dortmund yaseGermany, ne-Ulsan HD yaseSouth Korea kuGroup F. Lawa amaqembu angathathwa kancane kunobhutshuzwayo emhlabeni.
UMokwena, oqeqesha iWydad Casablanca yaseMorocco, uzothola ithuba lokubhekana nomqeqeshi amthandayo uPep Guardiola oqeqesha iManchester City.
Eqoqweni uGroup G kukhona iWydad, iCity yase-England, yi-Al Ain yase-United Arab Emirates neJuventus yase-Italy.
KuGroup A kukhona i-Al Ahly yase-Egypt, yiFC Porto yasePortugal, yi-Inter Miami edlala kwiMLS yase-United States, nePalmeira yaseBrazil.
I-ES Tunis yaseTunisia, ineChelsea yase-England, yiFlamengo yaseBrazil neLeon yaseMexico.
Imidlalo yeFifa Club World Cup izoqala ngoJuni 15 ngonyaka ozayo.